Arbaco, April, 26, 2023 (HOL) - Midowga Yurub ayaa uga dhawaaqay magaalada Muqdisho inuu ka fulinayo deegaano ka tirsan gobolada dalka Mashruuc ku kacaya aduun lacageed oo gaaraya 4.5 Milyan oo Yuuro.
Mashruucaan ayaa ah mid loog talo galay xasilinta deegaanada iyo degmooyinka laga xureeyay Ururka Al-shabaab ee ku yaala gobolada dalka, gaar ahaan deegaanada maamulada kala ah Galmudug, Hirshabeelle, Koonfur Galbeed iyo Jubbaland.
Deegaanada laga xureeyay Al-shabaab ayaa mashruucaan looga hirgalinaya qodista Ceelal biyoodyo, dhismaha saldhigyo Boolis ah, rakibidda layrarka Cadceedda ku shaqeeya iyo waliba qabashada kulamo dib u heshiisiin ah oo loo sameenayo dadka ku nool deegaannada laga saaray kooxda Al-Shabaab.
Mashruucan ayaa la tilmaamay in wajigiisa koowaad laga bilaabayo magaalooyinka kala ah Xarardheere, Ceeldheer, Maxaas, Matabaan, Teedaan, Raage ceele iyo Aadan Yabaal oo dhamaantood ah deegaanadii Al-shabaab laga xureeyay, islamarkaana ka tirsan maamulada Galmudug iyo Hirshabeelle.