Axad, Maarso, 6, 2022 (HOL) - Madaxweynihii hore ee maamulka Koonfur Galbeed Shariif Xasan Sheekh Aadan, ayaa saakay laga hor istaagay in uu ka duulo garoonka Aadan Cadde, isagoo ku wajahnaa magaalada Baydhabo
Shariif Xassan, ayaa doonaya inuu u tartamo kursi yaala Magaalada Baydhabo oo uu horay ugu fadhiyay wiilkiisa.
Warar aan helayno waxay sheegayaan in diyaaradii qaadi lahayd Shariif Xasan lagu amray in aanay Baydhabo kasoo dagi karin.
Inkastoo wasaaradda amniga Soomaaliya ay soo saartay warqad Shariif Xasan loogu oggolaanayo inuu ilaalo gaar ah iyo hub u qaato magaalada Baydhabo, haddana isagii iyo ciiddankiisaba looma oggolaan in ay ka duulaan garoonka diyaaradaha Muqdisho.
Xayiraada lagusoo rogay waxaa la sheegayaa inuu ka dambeeyo maamulka koonfur Galbeed oo horey sidaas oo kale Baraawe uga celiyay, guddoomiye ku xigeenkii koowaad ee barlamaanka Soomaaliya, Cabdiweli Ibraahim Muudeey.
Cabdiweli Ibraahim Muudey oo kursigiisu yaalay magaalada Baraawe ayaa laga hor istaagay inuu tago halkaas, waxaana maalin kadib kursigii uu ku fadhiyay loo doortay musharrax kale.
Koonfur Galbeed, siyaasiyiin badan oo muddo dheer kusoo jiray barlamaanka Soomaaliya ayaa tartanka doorashada laga reebay, iyagoo kuraastoodii loo doortay wajiyo cusub oo u badan dhallinyaro aan horey siyaasada ugu jiri jrin.