Jimco, December, 2, 2022 (HOL) - Wararka ka imaanaya deegaanka Deynuunaay ee gobolka Baay ayaa sheegaya in deegaankaasi gacan ku heyntiisa ay la wareegeen dagalaamayaasha kooxda Al-shabaab, kadib dagaalo culus oo shalay galinkii dambe halkaasi ku dhexmaray ciidamada dowladda iyo kuwa Al-shabaab.
Weerarka ka dhacay Deynuunaay galinkii dambe ee Shalay ayaa bilaawday kadib markii dagaalamayaal ka tirsan Shabaab ay weerar xoogan ku qaadeen Saldhiga ay ciidamada dowladda iyo kuwa maamulka Koonfur Galbeed ku lahayeen deegaankaasi.
Dagaalka ayaa la sheegay inuu ahaa mid aad u xooganaa oo la isku adeegsaday hubka noocyadiisa kala duwan, kaasoo geystay khasaare isugu jira dhimasho iyo dhaawac kala gaaray labada dhinac, hayeshee aanan si rasmi ah loo xaqiijin karin inta uu dhan yahay.
Al-shabaab ayaa mudo dhowr jeer oo hore weeraro culus ku qaaday deegaanka Deynuunaay oo ka mid deegaanada hoostaga degmada Baydhabo ee gobolka Baay, halkaas oo ugu dambeyn gacantooda soo gashay, kadib markii ciidamadii dowladda ee fariisinka ku laha deegaankaas ay isaga baxeen.
Ma jirto wax war ah oo kasoo baxay dhanka taliska ciidanka dowladda Soomaaliya oo ku aadan dagaalka ka dhacay Deynuunaay iyo la wareegitaanka kooxda Shabaab oo lasoo warinaayo iney ku sugan yihiin deegaankaasi.