Sabti, October, 22, 2022 (HOL) - Raysal wasaaraha Xukuumada Fedaraalka Soomaaliya Xamse Cabdi Barre ayaa Maanta ka qeyb galay munaasabad lagu xusayay laba ka mid ah Nabadoonadda Soomaaliyeed ee ku dhintay dagaalada ka dhanka ah Al-shabaab ee ka socda qaar ka mid ah gobolada dalka.
Munaasabaddaan oo ay soo qaban qaabisay Wasaaradda arrimaha gudaha Soomaaliya ayaa lagu xusaayay Nabadoonada kala ah Cilmi Hagar Guure iyo Hibaad Cali Dasar oo hormuud u ahaa dagaalada ka dhanka ah Al-shabaab ee haatan si weyn ugu sii faafaya gudaha dalka.
Raysal wasaare Xamse Cabdi Barre ayaa munaasabadda ka jeediyay khudbad dheer oo uu uga hadlaayay wax qabadkii Nabadoon Cilmi Hagar Guure iyo Hibaad Cali Dasar oo uu sheegay iney ahayeen mujaahidiin shahiid ah oo kor u qaaday sharafta dadka Soomaaliyeed.
“Nabadoon Cilmi Hagar Guure iyo Hibaad Cali Dasar oo shihiiday iyaga oo kor yeelaaya sharafta ummadeenna iyo qiimaha diinteenna suuban. Shihiid walba oo inooga shihiida dagaalka aynu kula jirno Khawaarijta, Xaq-udirir walba oo ku dhaawacma, ku xoola waaya iyo ruux walba oo u dhibtooda muddada kooban ee aynu dagaalka kula jiri doono kooxda khawaarijta ah, wuxuu bilad sharaf weyn ka heli donaa Dowladda iyo dadkeenna qiimaha badan” ayuu yiri Raysal Wasaare Xamse Cabdi Barre.
Raysal wasaare Xamse ayaa ugu baaqay madaxda iyo shacabka Soomaaliyeed iney ka qeyb qaataan dagaalada ka dhanka ah Shabaab ee ka socda gudaha dalka, isagoona sheegay in haatan ay guusha u dhaw dahay dowladda iyo shacabka Soomaaliyeed.
“Waxaan madaxda Soomaaliyeed iyo shacabkaba farayaa in ay si isku mid ah uga qeyb qaataan dagaalka ka dhanka ah nabad-diidka, Ruux walba dhaqaale ahaan, cudud ahaan iyo niyad ahaanba waa in ay uga wada qeyb-qaataan xoreynta dalkeenna iyo dadkeenna, Waxaa muuqata in dalka lagu xoreyn karo intii la filayay waqti ka yar. Dagaalka aan khawaarijta kula jirno, dadka ayuu badbaadinayaa, khasaaraha iyo dhimashada dadka Soomaaliyeed ayuu yareynayaaye ma badinayo. Hadii aan dagaal kula jirno shan sano ah, lix sano dagaalka foolka foolka ah inta nooga dhimata iyo inta Soobe kaliya nooga dhimatay hadii la is barbar dhigo, inta Soobe nooga dhimatay ayaa ka badnaan doonta ”ayuu yiri Raysal Wasaare Xamse Cabdi Barre.
Gabagabadii Raysal wasaaraha Soomaaliya wuxuu munaasabadda ka sheegay in dalka uu ku jiro dagaal dhab, islamarkaana dadka Soomaaliyeed laga doonayo in yeeshaan dhaqan dad uu dalkoodu dagaal dhab ah ku jiro ay dul qaataan oo ay ka fogaadaan waxyaabaha ay dowladdu mamnuucdo, una hoggaansanaadaan amarrada dowladda ee qeybta ka qaadanaya in guul laga gaaro dagaalka.