Wasiirkii hore ee dhallinyarada Hirshabelle oo kulan dhiiragelin ah u sameeyay bahda kubadda koleyga
Sabti, Juun, 4, 2022 (HOL) - Wasiirkii hore ee Dhallinyarada iyo Ciyaaraha dowlad-gobolleedka
Hirshabelle Cabdiqani Cabdullaahi Hilowle (Cabdiqani Jeenyo), ayaa maanta kulan
dhiiragelin ah u sameeyay bahdii kubadda koleyga ee cayaaraha uga socda magaalada
Muqdisho.
Kulanka waxaa kasoo qeyb-galay wasiirkii hore ee arrimaha
dibedda Soomaaliya Yuusuf Garaad Cumar, oo kamid ah bahda kubadda koleyga, guddoomiyaha
xiriirka kubadda koleyga C/laahi Nuur Maxamed Cadaani, ciyaartooyda kubadda
koleyga ee ka kala socday dalalka Tanzaniga, Ruwanda iyo Kenya iyo bahda
kubadda koleyga ee dalka Soomaaliya.
Kulanka sidoo kale waxaa kasoo qeyb-galay gabdhihii ugu
caansanaa kubadda koleyga ee xulka qaranka Soomaaliya, oo ay kamid ahaayeen Sucaad
Cabdullaahi Galow oo u cayaari jirtay naadiga Horseed, Mulki Nuur Muudeey oo u
cayaari jirtay naadiga Jeenyo iyo Geni oo u cayaari jirtay naadiga Ingi.
Yuusuf Garaad Cumar, ayaa ugu horeyn wasiirka dhallinyarada
uga mahadceliyay isku keenida halyeeyada kubadda koleyga, isagoona bahda
ciyaaraha kula dardaarmay muujinta maqaanka guud ahaan kubadda, gaar ahaan
koleyga. “Kubadda koleyga ee Soomaaliya waxaa ay leedahay taariikh mug weyn”,
ayuu yiri wasiir Yuusuf Garaad.
Wasiirkii hore ee dhallinyarada Cabdiqani Jeenyo, ayaa xusay
in kulamada nooca oo kale ah ay soo nooleynayaan kubadda koleyga ee dalka
Soomaaliya, maadaama wali ay joogaan ciyaartooydii u soo cayaaray xulka qaranka
Soomaaliya.
“Dalka waxaa uu sameynayaa horumar dhinac kastaba ah,
waxaana hadda dalkeenna ku sugan cayaartooy ajnabi ah oo kamid ah kooxaha ka
dhisan dalka, taasi waxaa ay muujineysaa in kubadda loo soo jeestay”, ayuu yiri
wasiirka, isagoona kusoo gunaanuday in uu mar walba u taaganyahay soo nooleynta
kubadda iyo dhiiragelinta dhallinyarada hamiga u heysa cayaaraha kubadda
koleyga.
Sucaad Cabdullaahi Galow ayaa hoosta ka xariiqday in
isu-imaatinnada noocan oo kale ah ay dhiiragelin ballaaran u tahay
dhallinyarada xiiseysay kubadda koleyga, ayna arki karaan in halyeeyadii
qaranka ay wali isku duubanyihiin, diyaarna u yihiin taageerida kubadda
koleyga.
“Kulanka waxaa looga hadlay horumarada laga gaaray dib-u-soo
nooleynta kubadda koleyga, waxaana la ammaanay dhammaan bahda kubadda koleyga
iyo dhallinyaro badan oo dibadda ka timid oo wax tar badan ku kordhisay kubadda”,
ayey u sheegtay HOL.
Guddoomiyaha xiriirka kubadda koleyga C/laahi Nuur Maxamed
Cadaani, oo ka sheekeeyay duruufaha xiriirka uu ku shaqeeyo ayaa xusay in
bartamaha bisha Julay ee sannadkan ay xulka kubadda koleyga Soomaaliya ay aadi
doonaan dalka Masar, halkaaso oo ay uga qeyb-geli doonaan tartanka
ciyaartooyada da’dooda ay ka yartahay 18-ka sano.
Hassan Istiila, Hiiraan Online
[email protected]
