12/6/2021
Today from Hiiraan Online:  _
Wararka Maanta- Arbaco, Nov 24, 2021
Puntland oo beenisay in duufaan culus kusoo wajahan tahay gobolka Bari
 

Arbaco, November, 24, 2021 (HOL) - Hay’adda maaraynta masiibooyinka ee maamulka Puntland ee HADMA ayaa wax kama jiraan ku tilmaamtay warar sheegaya in Puntlad ay kusoo wajahan tahay duufan culus.

Xiriir ay warbaahintu la sameysay masuuliyinta hay’addaas ayay u sheegeen in aanay jirin cabsi hadda laga qabo in duufaanta soo gaarto Puntland gaar ahaan gobolka Bari.

Masuuliyiintu waxay sheegeen in duufaantu ku socoto xawaare hooseeya oo ah 35km saacaddiiba, taasoo aanay suurtagal ahayn in ay si dhow kusoo gaarto xeebaha Puntland.

“Annagu ma hayno duufaantaas, mana garanayno meesha ay ka keeneen dadku,” ayuu yiri. Cabdullaahi Cabdiraxmaan Axmed Ceyrow, guddoomiyaha hay’adda HADMA ee Puntland.

Hadalka hay’adda HADMA ayaa kusoo beegmaya, iyadoo wasaaradda gargaarka dowladda Soomaaliya ay ka digtay duufaan ku socota xawaare sare oo laga cabsi qabo in ay  ku dhufato xeebaha gobolka Bari ee Puntland

Sannad kaste, marka la gaaro bilaha december iyo november, waxaa Puntland laga fishaa roobab dabeylo sita oo ka yimaada dhinaca xeebaha badda cas iyo badweynta Hindia.

Waqti xaadirkan, Puntland dhulkeeda waxaa badi ka jira abaaro aad u darran oo saameeyay dadka reer guuraaga, kadib markii Roobabkii Gugii iyo dayrtii ugu dambeysay aanay si fiican uga da’in gobolada Puntland.

Abdiweli M. Sheikh, Hiiraan Online












Click here
11/24/2021 1:24 PM EST
Arbaco, November, 24, 2021 (HOL) - Waxaa maanta magaalada Muqdisho ku geeriyooday allah u naxariistee Muxidiin Sheelh Muumin oo loo yaqiinay Jiim Sheekh Muumin, kaasoo mudooyin dambe xanuunsanaa sida warbaahinta u sheegeen qaar ka mid ah ehelkiisa.

11/24/2021 1:00 PM EST
Arbaco, November, 24, 2021 (HOL) - Hay’adda maamusha ciiddanka nabad sugida Puntland ee PSF ayaa sharci darro ku tilmaamtay degreeto uu madaxweynaha Puntland ku magacaabay agaasimaha cusub ee PSF.

11/24/2021 8:40 AM EST
Arbaco, November, 24, 2021 (HOL) - Doorashadii ugu horreysay ee aqalka hoose ee deegaannada dowlad goboleedka Galmudug, ayaa lagusoo gabagabeeyay magaalada Dhuusomareeb iyadoo la doortay labadii kursi ee ugu horreeyay.

11/24/2021 8:24 AM EST
Arbaco, November, 24, 2021 (HOL) - Guddoomiyaha maamulka gobolka Hiiraan Cali Jeyte Cismaan iyo Saraakiisha ciidamada AMISOM ee ku sugan magaalada Baledweyne ayaa maanta kulan xasaasi ka yeeshay dardar gelinta arrimaha amniga doorashooyinka Golaha Shacabka oo lagu wado in lagu qabto magaalada Baledweyne ee xarunta gobolka Hiiraan.

11/24/2021 8:14 AM EST
Arbaco, November, 24, 2021 (HOL) - Wasiirka Difaaca dalka Turkiga Hulusi Akar ayaa magaalada Ankara ee caasimadda dalka Turkiga kula kulmay taliyaha guud ee ciidamada Milliteriga Soomaaliya Sarreeye Guuto Odawa Yuusuf Raage.

11/24/2021 7:38 AM EST
Arbaco, November, 24, 2021 (HOL) - Wararka ka imaanaya dalka Itoobiya ayaa sheegaya in talada dalka Itoobiya uu siihaynayo Ra'iisal Wasaare ku xigeenka Itoobiya Demeke Mokonnen, maadaama Abiyi Axmed uu hoggaaminayo ciidamada qaranka Itoobiya ee dagaalka kula jira TPLF.

11/24/2021 6:23 AM EST
Arbaco, November, 24, 2021 (HOL) - Madaxweynaha Puntland Siciid Cabdullaahi Deni, ayaa S/guuto Maxamed Amiin Cabddulahi Xaaji Khayr u magacaabay agaasimaha hay’adda maamusha ciiddanka PSF ee uu Maraykanku maalgaliyo.

11/24/2021 4:29 AM EST
Arbaco, November, 24, 2021 (HOL) - Guddoomiyaha xisbiga mucaaradka Somaliland ee UCID, oo horay uga mid ahaa xubnihii Somaliland uga qayb gali jiray wada-hadalada Somaliland iyo Soomaaliya, ayaa sheegay in ay joojinayaan wada-hadalada.

11/24/2021 3:36 AM EST
Arbaco, November, 24, 2021 (HOL) - Waxaa goordhaw oo maanta ah markale lagu doortay xarunta ciidanka Booliiska Soomaaliyeed ee Jenaraal Kaahiye hal kursi oo ka mid ah kuraasta Golaha Shacabka ee gobolada Waqooyi ee Soomaaliland.

11/24/2021 3:29 AM EST
Arbaco, November, 24, 2021 (HOL) - Taliyaha ciiddanka lugta ee xoogga dalka Soomaliyeed, General Maxamed Biixi ayaa sheegay in aysan marna raalli ka ahaan doonin in AMISOM ku gorgortanto joogitaankeeda Soomaaliya, si loogu fuliyo danaheeda.

11/24/2021 1:14 AM EST
Arbaco, November, 24, 2021 (HOL) - Waxaa goordhaw lagu wadaa in magaalada Dhuusamareeb ee Caasimadda maamulka Galmudug inay ka bilaabato doorashada laba kursi oo ka mid ah kuraasta Xildhibaanada deegaan doorashadoodu tahay Galmudug.