Isniin, Janaayo, 06, 2020 (HOL)- Iyadoo ay sii kululaaneyso xiisada Diblomaasiyadeed ee u dhaxeysa Mareykanka, Ciraaq iyo Iiraan, ayuu madaxweyne Donald Trump ugu hajabay dalka Ciraaq cunaqabateyn ballaaran haddii ay xukuumaddu meel mariso qaraarka ama go'aanka ka soo baxay Baarlamaanka
Barlamaanka dalka Ciraaq ayaa ansixiyay qorshe dalkaas looga saarayo ciidamada ajnabiga ah ee jooga gudaha wadanka Ciraaq.
Laakiin madaxweyne Trump ayaa sheegay in saldhigga cirka ee uu Mareykanka ku leeyahay Ciraaq ay ku baxday
balaayiin doolar, ciidamada Mareykakana aysan ka bixi doonin dalkaas
ilaa iyo inta mas'uuliyiinta dalkaas ay ka bixinayaan kharashka
Mareykanka uga baxay dhismaha saldhigaas.
Go'aanka uu gaaray Baarlamaanka dalka Ciraaq ayaa jawaab u ah dilkii uu Mareykanka gudaha dalka Ciraaq ugu geystay Jeneraal Qasem
Suleimani oo madax ka ahaa cutub kamid ah ciidamada ugu awoodda badan
Iran, waxaana dilkiisa ay sii hurisay xiisadii awalba u dhaxeysay Iran
iyo Mareykanka.
"Dowladda Ciraaq waa in ay si khasab ah uga shaqeysaa soo afjaridda joogitaanka ciidamada ajnabiga ah ee jooga dalka Ciraaq, lagana mamnuucaa in ay adeegsadaan hawada, dhulka iyo biyaha dalka Ciraaq,", ayaa lagu yiri go'aanka ka soo baxay Baarlamaanka dalkaasi Ciraaq.
Qaraarkan ay soo jeediyaan xildhibaanada barlamaanka ayaa u baahan in
xukuumadda dalkaas ay saxiixdo, si meesha looga saaro heshiiska hadda
jira ee ay xukuumadda Baqdaad la gashay Mareykanka.