Wasaaradda Difaaca Mareykanka oo ka hadashay weerarkii Al-shabaab ay ku qaadeen saldhigga Lamu
Isniin, Janaayo, 06, 2020,
(HOL)- Wasaaradda Difaaca Mareykanka
ayaa sheegtay in weerarkii shalay lagu qaaday saldhiggooda Miilitari ee gobolka
xeebta ‘’ Lamu ‘’ ee dalka Kenya lagu
dilay saddex ruux oo isugu jiray Askari Mareykanka ah iyo Labo ruux oo
Qadaraaslayaal ah.
Sidoo kale waxaa ay sheegtay in weerarkaa lagu dhaawacay Labo
ruux oo Mareykanka ah kuwaa oo xaaladoodu wanaagsan tahay.
Dagaalyahannada Ururka Al-Shabaab ayaa weerrar ku
qaaday maalintii shalay saldhig ay degenaayeen ciidamada Mareykanka, iyaga
oo sheegtay in waqti kooban ay la wareegeen gacan ku heynta saldhigga.
War Qoraal ah oo dhankooda ka soo baxay ayeey ku
sheegeen in ay weerarkaasi ku dileen 17 Askari oo Mareykan ah 9 ka tirsan
ciidamada Kenya.
Balse war qoraal ah oo ka soo baxay Taliska Africom
ee Mareykanka ayaa lagu sheegay in
sheegashada Al-shabaab tahay been la dhoodhoobay.
"Al-Shabaab waxaa ay miciin bideen been, si
ay sare ugu qaadaan sumcadooda ayna u abuuraan cinwaano been abuur ah,"
waxaa sidaasi sheegay Janaraal William Gayler, oo ah agaasimaha (AFRICOM) .
Mareykanka ayaa bishan oo kaliya dhowr weerar oo
cirka ah ka geystay gudaha dalka Soomaaliya iyaga oo sheegay in ay ku dileen
weerarradaas xubno ka tirsan Ururka Al-shabaab.
C/raxmaan Diini,
Hiiraan Online
[email protected]
