Dowladda oo sheegtay in ay howlgal ku dishay ku dhawaad 30 xubnood oo ka tirsan Ururka Al-shabaab
Jimco,Janaayo, 03, 2020 (HOL)-Dowladda Soomaaliya ayaa sheegtay in howlgal militari oo ay ka fuliyeen ciidanka xoogga dalka Soomaaliyeed qeybo ka mid gobolka Shabeellaha Hoose ku dileen ku dhawaad 30 xubnood oo ka tirsan Ururka Al-shabaab
Saraakiisha qeybta ka ahaa howlgalka ayaa warbaahinta u sheegay in deegaanka Buulo Eyle oo 4 KM ujira deegaanka Bariire ee Gobalka Shabeellada Hoose ku burburiyeen Labo Gaari xaamuul ah kuwaasi oo lagu diyaarinayay Qaraxyo iyaga oo sidoo kalana dilay ku dhawaad 30 xubnood oo ka tirsan Ururka Al-shabaab.
Taliyaha guudata 16aad, ee Danab Gaashaanle Ismaaciil Cabdimaalik Maalin ayaa Warbaahinta Ciidamadda Qalabka Sida u sheegay howlgalka in uu ahaa mid Qorsheeysan islamarkaasna ay ka warheleen in ay diyaarinayaan Gaadiid qaraxyo ah oo ay doonayaan inay kuwaxyeeleeyaan Shacabka aan waxba galabsan.
Howlgalkaan ayaa qeyb ka ah howl-gallo ay Ciidanka Kumaandooska xoogga dalka ee Danab ku todobaadyadii la soo dhaafay ay ka wadeen deegaanno iyo degmooyin ka tirsan gobolka Shabeellaha Hoose.
Ma jiro wax war ah oo ka soo baxay dhinaca Al-shabaab oo la xiriira howlgalka la sheegay in lagu dilay tiro badan oo ka mid ah dagaalyahannadooda.
C/raxmaan Diini, Hiiraan Online
[email protected]