Dowladda Soomaaliya oo dalbatay in loo soo gacan galiyo Wasiirkii hore ee Amniga Jubbaland Cabdirashiid Janan
Talaado, Feberaayo, 04. 2020 (HOL)-Dowlada Federaalka Soomaaliya waxa ay si rasmi ah u dalbatay waaran caalami ah (international warrant) oo loogu soo gacan gelinayo Cabdirashid Cabdinuur (Janan), kaas oo ka baxsaday caddaaladda.
Dowladda ayaa waxaa ay arintan xiriir kala sameysay Hay’adda Boliiska Caalamiga ah ee INTERPOL, si loogu maxkamadeeyo danbiyo la xiriira tacadiyo ka dhan ah xuquuqul insaanka iyo ku tacaddiga muwaadiniin aan waxba galabsan.
Sidoo kale, Dowladda Federaalka Soomaaliya waxaa ay dhiggeeda dalka Kenya ka codsatay in sida ugu dhaqsiyaha badan ay u soo qabato, una soo wareejiso eedeeysane Cabdirashid Xasan Cabdinuur (Janan), arrinkaas oo xoojinaya dadaallada heer Gobol ee ilaalinta xuquuqda aadanaha iyo adkeynta xasilloonida.
Warka ka soo baxay dowladda Soomaaliya ayaa imanaya xili sidan oo kale qoraal ka soo baxay hay'adda Amensty International oo lagu looga codsaday Kenya in u gacan galiso dowladda Soomaaliya Cabdirashiid Janan.
C/raxmaan Diini, Hiiraan Online
[email protected]
