Xukuumadda Somaliland oo caruurta ku dhasha wadanaha oo daloolla bilaash uga dhigtay dawayntooda
Isniin, Febraayo 03,2020 (HOL )–Madaxweyne Muuse Biixi ayaa goor habeenimo ah booqday cusbitaalka gaar loo leeyahay oo lagu dabiibo caruurta yaryar ee ku dhasha iyaga oo wadnuhu daloolo, taas oo kharashkooda ay bixiso dawladdu.
Caruurtan ku dhasha wadnaha oo daloola ayaa dawladdu ka bixisa lacagta
lagu dawaynayo, taas oo wax kharash ahi kaga bixin qoysaskooda sida ay
xukuumadu sheegtay.
Qaar kamid ah dhakhaatiirta gacanta ku haya daaweynta loo sameeyey
ubadka yar yar ee wadnuhu daloolay oo halkaas ka hadlay, ayaa ka sheekeeyey dedaalka ay u galeen carruurta
yar yar iyo dhibaatadii ay hore u soo mareen, waxana ay ballan qaadeen inay sii
wadi doonaan caawinta ubadka yar yar, iyaga oo madaxweynahana ku ammaanay sida
uu ugu dhiirraday inuu bixiyo kharashka lagu daboolay baahida caafimaad ee
ubadkaas.
Madaxweyne Biixi ayaa dhakhaatiirta uga mahadceliyey kaalinta ay ka
qaateen daaweynta ubadkaas yaryar, waxana uu caddeeyey inuu carruurtaas
kharashkii lagu daaweeyey ka bixiyey qasnadda qaranka, waxana uu yidhi,
“Kharashku waa kharashkii qaranka, xaq baynna ku leeyihiin, ninka masuulka
ahina wixii qaranku hayaa, wax Hooyaday iyo Aabahay iiga tageen oo anigu aan
leeyahay oo gaar ah maan bixine waa xoolihii qaranka, iyagaana ugu mudan oo
qofka bukaanka ahina qaranka wixiisa wax buu ku leeyahay.”
Carruurta soo dhalata iyaga oo wadnuhu daloolo, ayaan hore dalka
gudihiisa waxba lagaga qaban jirin, islamarkaana intii kharash hesha oo kali
ahi ay dalka dibaddiisa qaban jirtey, balse madaxweynaha ayaa go’aansaday inuu
isagu bixiyo kharashkaas, dalka gudihiisana la keeno agabka iyo dhakhaastiirta
loo baahan yahay si ubadkaas dalka wax loogu qabto.
Sidoo kale, madaxweynuhu wuxuu cusbitaalka International ee magaalada Hargeysa ku booqday Oday Maxamed
Diiriye oo ah Aabaha dhalay wasiirka wasaaradda waxbarashada iyo Sayniska
Somaliland, Mudane Axmed Maxamed Diiriye (Toorno) oo xaalad caafimaad u jiifa
halkaasi.
Barkhad-ladiif M. Cumar, Hiiraan Online
[email protected]
Hargeysa, Somaliland.