Madaxweyne Biixi oo xafiiskiisa ku qaabiley Safiirka midowga Yurub u qaabilsan Soomaaliya
Sabti, Febraayo 01, 2020(HOL)– Madaxweynaha Somaliland, Mudane Muuse Biixi Cabdi,ayaa maanta xafiiskiisa ku qaabiley safiirka midowga yurub u qaabilsan Soomaaliya Amb. Nicolas Berlanga Martinez, kaasi oo maalmahan ku sugnaa magaalada Hargeysa.
Sida war-saxaafadeed lagaga
hadlayo kulankooda ayaa la sheegay in
lagaga wadda hadlay xoojinta xidhiidhka wada-shaqayneed ee midowga yurub iyo
Somaliland ka dhexeeya, sidoo kale waxa laga wada hadlay taageerada ay beesha
caalamku ka geysato horumarka arrimaha bulshada, doorashooyinka iyo sidii kor
loogu qaadi lahaa qoondada dhaqaale ee ay midowga yurub ku taageeraan dalka
Somaliland, isla markaana loo dardar gelin lahaa mashaariicda horumarineed.
Ugu danbayntiina waxa kulankaasi
lagu lafo-guray sidii laysaga kaashan lahaa horumarka iyo amniga guud ee
mandaqadda geeska Afrika.
Safiirkan ayaa hore ula kulmay
xisbiyada mucaaradka ah, waxaanay wararku sheegayaan in arrinta ugu muhiimsan
ee lagaga wada hadlay kulan ay tahay arrimaha doorashooyinka iyo soo afjarida
khilaafka guddida doorashooyinka oo uu madaxweynuhu hore u sheegay in dhamaadka
bisha Janaayo la dhamayn doonno khilaafyada guddida doorashooyinka sida
xisbiyada mucaaradku sheegeen.
Dhinac kale, Madaxweyne ku
xigeenka Somaliland, Mudane Cabdiraxmaan Cabdilaahi Ismaaciil (Saylici) oo ayaa
xafiiskiisa ku qaabiley wefti ka socday hay’adda UNCDF oo u qaabilsan adduunka
horumarinta dhaqaalaha ee dawladda hoose oo uu hoggaaminayey David Jackson oo
ah agaasimaha guud ee 39-ka dawladdood ee ka soo koraya dhinaca dhaqaalaha.
Waxaana kulankaasi lagaga wada
hadlay horumarinta dawladdaha Hoose ee JPLG-ga, waxaanu madaxweyne ku xigeenku
warbixin ka siiyey madaxa weftiga halka uu marayo horumarinta dhaqaalaha
dawladdaha hoose ee Somaliland oo ay taageerto hay’addani, isagoo uga
mahadceliyey doorka hay’addaha UN-ku ay ka qaataan ka midho dhalinta
barnaamijka JPLG guud ahaan iyo khaasatan doorka horumarinta dhaqaalaha ee ay
hay’adda UNCDF ay ka taageerto Dawladdaha hoose ee Somaliland.
Iyadoo aad loogu lafo-guray
balaadhinta barnaamijkan si loo wada gaadho degmo doorashooyinka dalka
mustaqbalka iyo sidii fiiro gaara loo siin lahaa caasimada dalka, waxaanu
madaxweyne ku xigeenku u caddeeyey masuuliyiintaasi in qaybtii kaga aadanayd
dawladda a Somaliland ay dhinaceeda bixisay, gobolada bariggana ay ka bilowday
barnaamijka JPLG.
“Waxaa la isla qaatay in
xukuumadda iyo hay’adda UNCDF ay si wada jira uga wada hawlgalaan kobcinta
dhaqaale ee lagu horumarinayo barnaamijkan dawladaha hoose.Waxaana madaxweyne
ku xigeenka ku wehelinaayey kulanka Wasiir ku xigeenka wasaaradda Arrimaha
gudaha Somaliland, maayar ku xigeenka Caasimada Somaliland iyo masuuliyiin ka
tirsan Xafiiska JPLG-ga u qaabilsan Madaxweyne ku xigeenka Somaliland.”ayaa
sidaas lagu yidhi war-saxaafadeed ka soo baxay xafiiska madaxweyne ku xigeenka.
Dhinaca weftiga UNCDF-na waxa ku
wehelinaayey agaasimaha UNCDF, Dmitry Pozhidaev oo ah masuulka xafiiska geeska
Afrika u qaabilsan hay’adda, Anka Kitunzi oo u qaabilsan Xidhiidhka hay’adda Somaliland
iyo Soomaaliya iyo masuuliyiinta xafiiska Somaliland ay ku leedahay Hay’addu.
Barkhad-ladiif M. Cumar, Hiiraan Online
[email protected]
Hargeysa, Somaliland.