Ganacsatada G Banaadir oo sheegay in si qaldan loo maamulo lacagaha looga qaado dhismaha Waddooyinka Muqdisho
Arbaco, September, 11, 2019 (HOL)-Kaddib kulan magaalada Muqdisho ay ku yeesheen mas'uuliyiinta ganacsatada gobolka Banaadir, ayeey ka soo saareen war-saxaafadeed la xiriira lacago looga qaado dhismaha Waddooyinka magaalada Muqdisho oo si qaldan loogu takrifalo.
Ganacsatada ayaa sheegay in lacago taburacaad ah
oo loogu tala galay dhismaha Wadooyinka magaalada Muqdisho bil kasta si
joogta ah looga qaado hadana ayan jirin wax muuqda oo lacagtaasi lagu qabto si khaldana loo maamulo.
War-saxaafaddeedka ka soo baxay kulanka ganacsatada oo nuqul ka mid ah soo gaaray Hiiraan Online ayaa siddan u dhignaa :-
Halkan Akhriso War Saxaafadeedka Ganacsatada soo saareen
Ku: Guddoomiyaha Gobolka Banaadir
Og. Handti-dhowrka Qaranka Soomaaliyeed
Og. Raysulwasaaraha Xukuumadda Fed. Soomaaliyeed
Og. Madaxweynaha Jumhuriyadda Fed. Soomaaliyeed
Ujeeddo: Warsaxaafadeed Wax Ka Qabasho Lacagta Jidadka
Annaga oo ah ganacsatada canshuurta ugu badan laga qaado , isla
markaasna ah aasaasayaalkii tabarucaadka dib-u-dhiska waddooyinka Muqdisho, lagana qaado tabarrucaadda ugu badan, waxaan ka codsanaynaa cid walba oo ay khuseyso in ay wax ka qabtaan musuqa lagu hayo lacagta tabarucaadda dib-u-dhiska waddooyinka Muqdisho.
Lacagtaan tabarucaada ah oo hadda uu maamulo Maxamuud Cabdikariim
Gabeyre, wax shaqo ah oo muuqda laguma qaban muddo hal sano ah.
Waxaan og-nahay in lacagtaas ganacsatadu looga qaado si joogto ah, iyada oo aysan jirin hab isla xisaabtan ama xitaa warbixinta xaalka ay ku sugan tahay lacagta muddadii uu maamulayey Gabeyre October 2018 ilaa September 2019.
Sidaasi awgeed Ganacsatada laga qaado tabarrucaadda dib-u-dhiska waddooyinka waxay dalbanayaan in:
- La xaqiijiyo in lacagta lagu qabto AKOON (XISAAB) aammin ah,
- Talada lagu maamulayo lacagta laga tixgeliyo ganacsatada laga qaado lacagta ugu badan,
- La soo bandhigo xisaab xirka lacagihii loo uruuriyey dhismaha
waddooyinka muddadii sanadka aheyd ee u dhexeysay Oktober 2018 –
September 2019.
Ma jiro wax jawaab ah oo dhinaca kale ay ka soo saareen war-saxaafaddeedka ka soo baxay ganacsatada gobolka Banaadir oo ka cabanaya in lagu takrifalo dhaqaalaha laga qaado.
C/raxmaan Diini, Hiiraan Online
[email protected]