Talaado, Maarso, 12,
2019 (HOL)- Magaalada Kismaayo ee xarunta KMG u ah maamulka Jubbaland oo uu ka
dhacay shirkii ugu danbeeyay ee madaxda dowlad gobolleedyada uga dhawaaqeen
sanadkii hore in ay xiriirka u jareen dowladda dhexe, waxaa hadda ku sugan wafdi
uu horkacayo ra’iisal wasaare Xassan Cali Kheyre.
Ra’iisal wasaaraha
iyo madaxweynaha maamulka Jubbaland oo u muuqda kuwo isku faraxsan ayaa shalay
meel fagaaro ah bartamaha magaalada Kismaayo waxaa ay kula hadleen boqolaal
dadweyne ah oo isugu soo baxay soo dhaweynta ra’iisal wasaaraha, laakiin Kheyre
oo khudbad kooban jeediyay ayeey hadalladiisu u badnaayeen mahad celin iyo
kaftan.
Shalay ilaa xalay
waxaa magaaladaa ka soconayay kulamo kala duwan oo ay yeelanayaan wafdiga
dowladda ee uu horkacayo ra’iisal wasaare Kheyre iyo madaxda maamul gobolleedka
Jubbaland gaar ahaan madaxweyne Axmed Madoobe.
Kheyre oo
socodaalkiisa Kismaayo muddo dheerba la sii hadal hayay ayaa u muuqda in uu ka shaqeynayo dhameynta khilaafka u dhaxeeya
dowladda iyo Jubbaland iyo waliba hagaajinta xiriirka labada dhinac.
Horay dowladda waxey ula heshiisay madaxweynaha maamulka Hirshabeelle Maxamed Cabdi Waare oo guddoomiye ku-xigeen ka ahaa Isbaheysigii maamul gobolleedyada.
Waxaa ay sidoo kale
madaxdu halkaa uga wada hadlayaan doorashada ku soo foolka leh Jubbaland iyo
waliba dagaalka ka dhanka ah Al-shabaab, iyadoo dhowr jeer oo hore deegaanno
hoostaga Kismaayo weeerarro is daba joog ah ka fuliyeen xoogagga Al-shabaab.
Kheyre ayaa maalmaha
soo socda ku sii sugnaan doona Kismaayo waxaana la filayaa in ugu danbeyntii
war laga soo saaro kulamada dhaxmaray wafdiga uu horkacayo iyo madaxda maamulka
Jubbaland.
C/raxmaan
Diini, Hiiraan Online
[email protected]
