Axad, Maarso, 10, 2019 (HOL)-Maamulka gobolka
Shabeellaha Hoose ayaa faah faahin ka bixiyay howlgallada Ciidamada
Kumaandoosta Soomaaliya iyo kuwa Mareykanka ka fuliyaan deegaanada Al-Shabab ay
kaga sugan yihiin gobolkaas.
Maxamed
Ibraahim Barre guddoomiyaha gobolka Shabeellaha Hoose ayaa sheegay in ciidamada
dowladda iyo saxiibadooda taageeraya ay howlgalladii ugu dambeeyay ay ka
fuliyeen Gobolka ay ku guuleysteen in ay bur buriyaan xarumo ay lahaayeen Al-shabaab.
Waxaa uu intaa ku daray in ciidamada Kumaandoosta
Soomaaliya ay sidoo kale weerarro cir iyo dhul ah ay ku qaadeen Saldhigyo Ururka
Al-Shabaab ay kaga sugnaayeen deegaanada, Awdheegle, Bariira, Janaale, Tuulada
Dacare iyo Kuunya Barrow.
Guddoomiyaha ayaa sheegay in deegaannadan lagu dilay xubno ka tirsan Al-shabaab oo qaraxyo diyaarinayay sidoo kalena
la bur buriyey xarumo ay gaadiidka lacag uga qaadi jireen sida uu hadalka u
dhigay.
Al-shabaab wax war ah kama aysan soo saarin sheegashada maamulka gobolka Shabeellaha ee burburita xarumo ay ku lahaayeen gobolka.
C/raxmaan Diini,
Hiiraan Online
[email protected]
