Beelaha Shanta Shanbaro ee Jubbooyinka oo ka cabanaya Faragalin dhanka Oday dhaqameedkooda ah
Isniin, July, 29,
2019 (HOL)- Nabadoono dubab iyo Ugaasyo ka tirsan Beelaha Shanta Shanbaro
ee gobolada Jubbooyinka ayaa shir Jara'id ku qabtay magaalada Columbus
Ohio.
Waxgardkan Shanta shanbaro Ujeedka Kulankooda waxa uu
daaranaa soo gudbinta tabashooyinkooda ku aadan isbadalka Jubbaland iyo
doorashooyinka la galayo iyaga oo ka cabanaya in shaqsi aan ahayn Ugaaska
Beelaha shanta Shanbaro loo igmaday in uu noqdo qofka soo xulaya xildhibaanada
Beelaha Shanbaro.
Masuuliyiinta Maamulka Jubbaland, Waxgaradka, Odayaasha
Beelaha, Ugaasyada, Nabadoonada, siyaasiyiinta iyo cid walba oo ku lug leh
isbadalka Jubbaland waxa ay u soo jeediyeen in laga feejignaado waxa ka dhalan
kara in Beelaha Nabadoonadooda, Ugaasyadooda, Duubabkooda iyo dhaqankooda la
faro galiyo Taas oo wiiqi kart midnimada Beelaha iyo dadka deegaanka.
Waxay Baaq u direen gudiga doorashada Madaxweynaha hada
haya Talada Maamulka Jubbaland iyo odayaasha dhaqanka in dib loo eego habka loo
farogaliyay dhaqankii Beelaha shanta shanbaro iyo in dib u saxid dag dag ah la
sameeyo.
Ugaasyada iyo Nabadoonada qabtay shirkan Jara'id oo
qaarkood dhawaan dalkii ka soo laabtay ayaa Rajo xumo ka muujinaya hadii
dhismaha Jubbaland loo sameeyo hab aan haboonayn oo ay ula jeedaan in dhaqanka
soo xulaya xildhibaanada ay noqdaan kuwii saxda ahaa ee beelaha Shanta
Shanbaro.
Dowlada Soomaaliya, Beesha Caalamka iyo shacabka
Jubbaland ba waxa ay ka codsadeen in Talada Beelaha Shanta Shanbar dib loogu
soo celiyo Ugaasyadii iyo Nabadoonadi asalka u ahaa.
Qaarkamid ah waxgaradkan ayaa dhanka kale ku dheeraaday
sida ay maamul iyo nidaam kasta oo soo maray Jubbaland ay ugu dulmanaayeen tan
iyo wixii ka danbeeyay Burburkii dowladii dhexe ee Soomaaliya balse hada la soo
gaaray waqtigii ay codkooda muujin lahayeen.
Xildhibaano federaal ah oo ka soo jeedo Beelahan iyo
waxgarad kale ayaa xariir la sameeyay Maamulka Jubbaland iyo Dowlada Soomaaliya
si wax looga qabto cabashadooda ayna rajaynayaan in la dhagaysto.
Cabashada Beelaha Shanta Shanbaro oo ka mid ah Beelaha
daga Jubbada Hoose iyo Jubbada Dhexe waxay ku soo aadaysaa xili la filayo in
dhawaan ay qabsoonto doorashada Madaxnimada Jubbaland.
Deeqo Shire SONNA
Columbus Ohio
