Talaado, December, 31, 2019
(HOL)- Ururka Al-shabaab ayaa si deg deg ah u sheegtay mas’uuliyada Qaraxii
dadka badan galaaftay ee Ex-Koontarool Afgooye kaddib Warkii ka soo baxay hay’adda
Nabad-sugida ee ahaa in Qaraxaasi uu ka danbeeyay qorshihiisa Dal Shisheeye
Marka dib loo noqdo Ururka
Al-shabaab ayaa ka gaabsaday sheegashada Qaraxii 14kii October sanadkii 2017 ka
dhacay Isgoyska Zoobe ee magaalada Muqdisho kaas oo muuqaal ahaan aan wax badan
ka duwaneyn kii 28kii bishan ka dhacay Ex Koontarool Afgooye.
Haddaba su’aasha meesha ka soo
baxeysa ayaa ah waxa isku soo beegay Warka hay’adda NISA iyo sheegashada Ururka
Al-shabaab?
Dadka sida weyn ula socda
Arrimaha Amaanka ayaa qaba in lagu qasbay markan Ururka Al-shabaab in uu ku
dhiirado sheegashada Qaraxan iyaga oo u muuqda kuwa meesha ka saaraya hadalkii
ka soo yeeray hay’adda Nabad-sugida iyo Sirdoonka Qaranka oo warbixintooda ku sheegay in qaraxa ay ka danbeysay dowlad shisheeye.
Sidoo kale waxaa ay noqoneysaa
markii ugu horreysay oo Al-shabaab si toos ah uga tacsiyadeeyaan geerida Dadka Shacabka ee ku dhinta Qaraxyada ay fuliyaan iyadoo horay arrintan oo kale aan
looga barran.
Sheegashada Al-shabaab ayaa sidoo
kale u muuuqatay mid lagu beeninayay War lagu daabacay Wargeys ka soo baxay
dalka Turkiga oo lagu sheegay in Qaraxii Ex Koontarool Afgooye ay ka danbeeysay
Dowladda Isku-tagga Imaaraadka Carabta oo bartilmeedkeedu ahaa shaqaalihii
Turkiga ee dhintay.
Dadka ka faalooda Arrimaha
Amaanka ayaa qaba in haddii uusan soo bixin laheyn Warka hay’adda Nabad-sugida
ee ahaa in Dal Shisheeye uu ka danbeeyay Qaraxan Al-shabaab dhankooda ka gaabsan lahaayeen
sheegashadiisa si la mid ah kii 14kii October sanadkii 2017-dii ka dhacay
Isgoyska Zoobe iyo Qaraxii Shaamoow ee lagu beegsaday Ardeydii Qalinjabineysay oo hay’adda Nabad-sugidu si toos ah ugu eedeysay Ururka
Al-shabaab.
Saraakiil horay uga soo shaqeeysay
hay’adda Nabad-Sugida iyo Asxaabta Siyaasadda ayaa ugu baaqay dowladda in ay
cadeyso magaca dowladda shisheeye ee ka danbeeyay Qaraxan khasaaraha ballaaran
geystay si magdhaw uga bixiyaan dadkii rayidka ahaa ee ku nafwaayay.
C/raxmaan Diini, Hiiraan Online
[email protected]