Ku dhawaad 30 ruux oo u badnaa Ardey Jaamacadeed oo ku dhintay Qaraxii ka dhacay Ex Koontarool Afgooye
Sabti, December, 28, 2019 (HOL)- Ku dhawaad 30 ruux oo badnaa dad shacab ah ayaa lagu waramayaa in ay ku dhinteen Weerar Ismiidaamin ah oo subaxnimadii hore ee saakay lagu qaaday Barkootarool oo canshuurta lagu qaado Isgoyska Ex Kootarool Afgooye.
Dadka dhintay intooda badan ayaa la sheegay in ay ahaayeen Ardey Jaamacadeed iyo dad kale oo rayid ah oo la socday gaadiidka dadweynaha oo marayay halka uu qaraxu ka dhacay, waxaana ardeyda ku dhimatay Qarax la sheegay in ay la socdeen Gaari Bus ah.
Gaariga ayaa la sheegay in uu gabi ahaanba goobta ku basbeelay taasoo muujineysa in aysan jirin cid ka baxsatay dhamaanba dadkii saarnaa.
Waddada dhinaceeda ayaa la sheegay in la dhigay meydadka ku dhawaad 20 ruux oo ka mid ahaa dadkii ku dhintay Qaraxan oo noqonaya kii ugu cuslaa ee waayadan ka dhacay magaalada Muqdisho.
Wararku ayaa intaa ku daraya in uu jiro khasaare soo gaaray Injineerro Turkish ah oo la sheegay in laftirkooda ay la kulmeen Qaraxan goobta ka dhacay.
Ma jiro ilaa iyo hadda wax war war ah oo ka soo baxay dhinaca Laamaha Amniga oo la xiriira weerarkan Ismiidaaminta ah, sidoo kalana ma jirto ilaa iyo hadda cid sheegatay mas'uuliyadiisa.
C/raxmaan Diini, Hiiraan Online
[email protected]
