Isniin, April, 15, 2019 (HOL) –
Wararka naga soo gaaraya degmada Kaaraan ee gobolka Banaadir ayaa sheegaya in
rag hubeysan toogasho ku dileen qof la sheegay in uu ka tirsanaa dadka degmada
ku dhaqan.
Dad goobjoogayaal ah ayaa
sheegay in gaar ahaan dilkan uu ka dhacay meel aan wax badan ka fogeyn saldhiga
degmada Kaaraan, waxaana shaqsiga la dilay magaciisa lagu soo koobay Daashoow.
Kooxda dilka geystay ayaa
markiiba goobta isaga baxsaday, waxaana tagay halka uu dilku ka dhacay ciidamo
ka tirsan kuwa Booliiska saldhiga degmada Kaaraan oo halkaa baaritaanno ka
bilaabay.
Lama garanayo ilaa iyo hadda
sababta dilka hasse ahaatee waxaa uu qeyb ka noqonayaa dilalka inta badan ka
dhaca magaalada oo ay geystaan kooxo aan la garaneynin iyo ciidamada dowladda
intaba.
Xalay
ayeey aheyd markii deegaanka Ceelasha biyaha ee dulleedka Muqdisho lagu toogay
saddex ruux oo wada saarnaa gaari yar kaddib markii ay weerar ku soo qaadeen
dad la socday gaari kale oo markii ay dilka geysteen kaddib goobta ka baxsaday.
C/raxmaan Diini,
Hiiraan Online
[email protected]
