Isniin, April, 15, 2019 (HOL) –
Kulan ay isugu yimaadeen guddiga Amniga dowladda Soomaaliya ayaa looga digay
shacabka ku dhaqan magaalada Muqdisho dhigista dibadbaxyo kale oo rabshado
wata, waxaana kulanka warbixin looga dhigeystay guddoomiyaha maamulka gobolka
Banaadir Eng Cabdiraxmaan Cumar Cismaan Yariisoow.
Guddoomiyaha ayaa sheegay in la isla gartay in bulshada
Soomaaliyeed ay muujin karaan shucuurtooda oo ay la xisaabtami karaan dawladda
si nabad ah.
Booliiska ayuu sheegay in ay qabqabteen
shaqsiyaad loo soo qabtay mudaaharaaydadii shalay dhacay iyo fal-dembiyeedyadii
ka dhashay, Sharcigana la hor gayn doono, waxa uu sidoo kale sheegay in aysan
jirin cid sharciga ka wayn, askariga kasta oo ka tirsan ciidamada amniga ee
dhib u gaysta mawaadin Soomaaliyeedna sharciga la marsiin doono.
Guddiga u xil saaran amniga caasimadda ayaa
shirkooda ku caddeeyay in bajaajlaydu ay qayb muhiim ka yihiin bulshada,
kobcinta dhaqaalaha iyo shaqo abuurka, dawladduna ay si dhaw ula shaqaynayso oo
ay dhiirri gelisyo, guddiga amniguna ay la kulmayaan guddi ka socda bajaajlayda
si loo dardar geliyo wadashaqaynta, ayana sidoo kale jiri doonaan kulamo joogta
ah.
Waxaa uu guddigu shacabka ka codsaday in laamaha
amniga iyo maamulka gobalka ay kala shaqeeyaan sugidda amniga iyo hagaajinta
bilicda caasimadda.
C/raxmaan Diini,
Hiiraan Online
[email protected]
