Sabti, October, 05, 2019 (HOL)- Dowladda Soomaaliya
ayaa ku eedeysay dowladda Kenya in ay
ku xadgudubtay sharciga caalamiga ah ee duulista hawadda kaddib markii maanta
diyaarad ka soo duushay magaalada Nairobi ay si toos uga degtay magaalada
Kismaayo ee xarunta KMG u ah Jubbaland.
Dowladda Soomaaliya ayaa
dacwad ka dhan ah tallaabadan ay qaaday dowladda Kenya u gudbisay Qarramada
Midoobey gaar ahaan waaxda duulista Hawadda ee ICAO, waxaana ay dowladda Kenya
ku eedeysay in ay ku xadgudubtay sharciga caalamiga ah ee duulista Hawadda.
Diyaarada maanta ka degtay
magaalada Kismaayo oo nooceedu ahaa F/50 ayaa la sheegay in shatiga ay
isticmaashay laheyd shirkadda Jubba Airweys iyadoo uu lahaa diyaaradan
ganacsade Soomaaliyeed.
Diyaaradan ayaa lagu wadaa in
sidoo kale magaalada Garoowe ka soo qaado
wafuud lagu wado in ay ka qeybgalaan munaasabada caleemo saarka madaxweynaha
Jubbaland.
Arrintan ayaa imaneysa iyadoo
horay dowladda Soomaaliya u amartay in duulimaayada caalamiga ah soo maraan
magaalada Muqdisho ka hor inta aysan ka degin magaalada Kismaayo.
Dacwadan ayaa noqoneysa tii ugu horeysay oo ka dhan ah dowladda Kenya oo ay Soomaaliya u gudbiso Qarramada Midoobey.
C/raxmaan Diini, Hiiraan Online
[email protected]