Xubno wasiiro ah oo degmadda Saylac u tagay dajinta shaqaaqo laba beelood u dhexeysay
Khamiis, Octobar 03, 2019 (HOL )– Laba beelood ayaa shaqaaqo dhinaca Beeraha ahi ku dhex martay deegaanka wadajir oo ka tirsan degmada Saylac ee gobolka Selel, taas oo qaar ka mid ah golaha wasiiradda u tageen sidii khilaafkaasi loo soo afjari lahaa.
Wasiiradda ka qaybgallaya xalin
khilaafkaasi labadda beelood waxa ka mid ah wasiirka Gaashandhiga, wasiirka
caafimaadka, wasiirka Horumarinta Biyaha, wasiir ku xigeenka arrimaha gudaha
iyo hogaanka hawlgalinta ee ciidanka Booliska.
Weftigan waxa hogaaminaya
wasiirka horumarinta biyaha Somalilad Saleebaan Yuusuf Cali Koore, waxaanay
weftigan wasiiraddu gooni gooni ula kulmeen odayaasha labada dhinac si loogu
garqaado labaddda beelood.
Wasiirka wasaaradda horumarinta
Biyaha Somaliland Md. Saleebaan Yuusuf Cali Koore, ayaa sheegay in labadan
beelood yihiin kuwo ilaahay ku uumay dhulkan,isla markaana aanay jirin meel ay
ku kala tagayaan, kuwaas oo isku ah xidid, xigaal, abti iyo adeer wax kala
kaxaynayaana aanu jirin, waxaanu ku booriyey inay nabadda ilaaliyaan.
Wasiir Saleebaan Yuusuf Cali
Koore waxa uu ka codsaday labada dhinacba inay u hogaansamaan garta iyo
go’aamada dawladeed ee ka soo bixi doona arintaas ay xalinteeda deegaankaas u
tageen, wuxuuna ku dheeraaday inay mid dhaqan iyo mid dawladeedba isugu geyn
doonaan.
Wasiiradan ayaa sheegay inay
xukuumaddu go’aanno adag ka qaadanayso shaqaaqooyinka soo noqnoqda ee ka dhaca
gudaha Somaliland, isla markaana aanay aqbali doonin inay daba dheeraato
iskhilaafka beeluhu, wuxuuna u mahad celiyey labada beelood ee degaankaas wada
dega ee ay shaqaaqadu dhexmartay oo uu sheegay inay isxakameeyeen intii
awoodooda ah, kuna bogaadinayaan dulqaadkaas ay muujiyeen.
“Labada reer ee aanu maanta halkan u joognaa
intii ILLAAHEY wada abuurayba waa ay wada noolaayeen, waaney isgaadhayeen guri
kasta iyo mid kasta iyo qoyskasta way is dhaleen, aad iyo aad ayaan ugu mahad
naqaya qofkasta oo ka qayb qaatay, waxaanan cidkasta ka codsanaynaa inay u
hagaansamaan Garta iyo go’aanka dawladda hadii aanay bulshadu sidii dhaqankana
u heshiin gartan dawladnimadana aanay aqbalin meesha waxa ka soo baxaysa waxaa
uu noqonaya wax adag, taariikh ayaynu heysanaa goobo badan oo la degan yahay
ayay Somaliland dhibtaasi ka socotay, hadasa waxaa la ii sheegaya in deegaan
Lughaya ka tirsan oo la yidhaahdo Gargaara Bari in dhibi ka jirto, tan la mid
ahi waxaanan dawlada ka go’an in ay go’aan adag ka qaadato, shaqaaqooyinka soo
noqnoqonaya ee beelaha dhexdooda, qofkasta waxaa aanu halkan uga gudbineynaa in
aanay dawladu mar danbe u dulqaadan doonin khilaaf beeleed oo riiq dheerada oo
ciidanka Qaranka iyo hantida dawladuba ay ku burburto.”
Wasiirka Beeraha Somaliland Axmed
Mumin ayaa isna la sheegay inuu go’aan ka soo saarayo arrimaha beeraha ee la
isku hayo, taas oo salku ku hayo khilaafka labaddan beelood.
Barkhad-ladiif M. Cumar, Hiiraan Online
[email protected]
Hargeysa, Somaliland.