Xildhibaanno ka soo horjeestay qorshe Puntland ay ku joojisay xafiisyo ay furteen Wasiirro heer Federaalka
Axad, October, 20, 2019 (HOL) – Qoraalka soo baxay
Wasaarrada Arrimaha Gudaha Dowlad gobolleedka Puntland ayaa sharci darro lagu
tilmaamay xafiisyo Wasiirro ka tirsan dowladda Federaalka oo ka soo jeeda
Puntland ka furteen deegaan doorashadooda.
Puntland ayaa ku tilmaamtay tallaabada ay qaadeen
Wasiirradan oo sidoo kale ka tirsan Golaha Shacabka Soomaaliyeed mid sharci
darro ah, madaama markii horeba aysan ku iman hab deegaan laakiin lagu soo
doortay habka beelaha ee 4.5.
Laakiin tallaabadaa ay qaaday Puntland waxaa diiday oo ka
soo horjeestay xildhibaanno iyo Senator-ro ka tirsan Aqalka sare oo sheegay in
aysan wafaqsaneyn go’aankaa ay qaadatay Puntland.
Senator Max’uud Mashruuc oo ka mid ah Aqalka sare
ee Baarlamanka Soomaaliya ayaa sheegay in go’aankaas mamnuucista ah uu yahay
mid ka hor imaanaya dastuurka Soomaaliya, isla markaana kala duwanaashaha
fikirka nooca doorashada dalka ka dhici doonta 2020 aysan Puntland u adeegsan
karin is hortaagga xuquuqda matalaadda.
“Madaxda Puntland waa inay ka fogaadaan wax kasta
oo dhaawici kara midnimada Qaranka Soomaaliyeed” ayuu yiri Senatorka oo soo
dhaweeyey fikradda ah in degaan doorashada iyo xubinta ku matasha Baarlamaanka
ay wada yeeshaan xiriir joogto ah.
Xildhibaan Cabdiraxmaan Dhoore oo tirsan Golaha wakiillada Puntland ayaa isna sharci-darro ku tilmaamay Go’aanka
Wasaaradda Arrimaha gudaha Puntland, waxaana uu ugu baaqay Wasaaradda inay ka
laabato warqadda joojinta xafiisyada ay Puntland ka furteen Xubno katirsan
golaha Wasiirada Soomaaliya.
Waxaa sii xoogeysanaya khilaafka u dhaxeeya
Puntland iyo Dowladda Dhexe ee Federaalka, iyadoo qoraalkan ka soo baxay
Wasaarradda Arrimaha Gudaha Puntland uu muujinaya sida uu u sii xumaanayo
xiriirka labada dhinac.
C/raxmaan Diini, Hiiraan Online
[email protected]