Dowladda Norway oo Soomaaliya ku taageertay lacag deyn ah oo dhan $353 milyan oo dollar
Khamiis, October, 10, 2019 (HOL)-Dowladda Norway ayaa shaaca ka qaaday in ay Soomaaliya amaahisay lacag dhan $353 milyan oo dollar, oo Soomaaliya ay isaga bixineyso lacagta looga leeyahay sanduuqa horumarinta Bankiga Aduunka
Wasiiradda arrimaha dibadda Norway, Ine Eriksen Søreide oo labo bil
kahor booqasho ku tagtay magaalada Muqdisho, ayaa maanta saxaafada
Norway u sheegtay in dhowrkii sano ee ugu danbeeyay ay Soomaaliya ka
hirgashay xasilooni amni iyo mid siyaasadeed. Waxeyna dowlada Soomaaliya
ku amaantay fulinta qorshayaasha amni iyo kuwa siyaasadeed ee dib loogu
soo nooleynayon nidaamka maaliyadeed ee wadanka, kuwaas oo ay sheegtay
inay muhiim u yihiin horumarka guud ee Soomaaliya.
Wasiiradda ayaa sidoo kale sheegtay in Soomaaliya ay wali ku
sugantahay xaalad nugul, sidaas darteed deynta ay Norway ku caawineyso
Soomaaliya, ay qeyb muhiim ah ka tahay dadaalka dib usoo noqoshada
hanaanka dowladnimo ee Soomaaliya.
Waxaa xusid mudan in deyntan aysan aheyn mid toos loo siinayo
Soomaaliya, balse ay tahay mid Norway ay ku shubeyso sanduuqa
horumarinta ee Bankiga aduunka, waxaana wixii intaas ka danbeeyo
Soomaaliya u furmi doonto inay deyn ka qaadan karto sanduuqa horumarinta
Bankiga Aduunka.
Soomaaliya ayaa haddii ay iska nadiifiso deynta looga leeyahay sanduuqa horumarinta Bankiga Aduunka waxaa u sahlanaan doonta in ay soo qaadato lacago amaah ah oo hor leh oo qeyb weyn ka qaadan kara fulinta mshaarciida hormarineed ee dalka.
Wasaarada arrimaha dibadda Norway ayaa sidoo kale sheegtay in bilowga
sanadka danbe ee 2020 magaalada Paris lagu qaban doonto shirka go´aan
ka gaarista barnaamijka deynta cafinta Soomaaliya. Waxeyna Norway rajo
wanaagsan ka muujiyay in Soomaaliya laga cafin doonto deynta lagu
leeyahay, hadii ay kasoo baxdo shuruudaha dhiman ee ku xiran heshiiska
qorshaha deyn cafinta ee u dhaxeeyo Soomaaliya iyo IMF.
C/raxmaan Diini, Hiiraan Online
[email protected]