Faysal Cali Waraabe “Dalka labadii sanadood ee uu madaxweyne Biixi xukunka hayey wax ka dhaca mooyee wax ku kordho may jirin”
Khamiis, November, 14, 2019 (HOL)-Gudoomiyaha xisbiga mucaaradka ah ee UCID, Eng;Faysal Cali Waraabe ayaa sheegay in labadii sanadood ee madaxweyne Biixi xilka hayey wax dalka ka dhaca mooyee aanay jirin wax usoo kordhiye,waxaanu xusay in loo baahan yahay wadatashi qaran sidii qaranka looga badbaadin lahaa madaxweynaha.
Sidaas waxa uu ka sheegay safar
dibada ah oo uu maanta ka soo noqday, waxaana si diiran ugu soo dhoweeyey
madaarka labadda xisbi mucaarad oo u muuqda inay si wada jir ah go’aamo
midaysan oo ay kaga hor imanayaan komishanka cusub u wada gaadhaan.
“Dalka labadii sanadood ee uu
madaxweyne Muuse Biixi xukunka hayey wax ka dhaca mooyee wax ku kordho may
jirin,dadku waxay lahaayeen mucaaradad adag ayaa loo baahan yahay laakiin anagu
waxaanu doonaynay in aanu wada shaqayn ku darno, oo tanaasul samayno “ayuu
yidhi gudoomiye Faysal Cali Waraabe.
Faysal waxa uu sheegay in aanay
la shaqayn doonin komishanka cusub inta uu ku jiro xubnaha ay diidan yihiin,
waxaanu yidhi “Komishanka waad ogtihiin intay soo socotay murankeedu, marka
lama shaqaynayno komishan uu ku jiro xubinta aanu diidanahay ee Cabdirashiid
Riyo raac, wadanka sidan lagu eegan maayo, niman odayaal ah oo aanu soo wada
hadalnay inaanu arrimahan taagan ka wada tashanno ayaanu maalmaha soo socda ka
wadatashan doonno, hadal wuu dhamaaday imika waxa loo baahan yahay ficil dalka
lagu badbaadiyo, dadkii masuuliyiinta ahaa ee sharciga ilaalin lahaa ayaa
maanta dalkii khatar galinaya.”.
Labada xisbi mucaarad ayaa si
weyn uga soo horjeestay xubnihii la ansixiyey ee guddida doorashooyinka,
waxanay sheegeen in inta laga saarayo xubnaha ay eedeynayaan aanay la shaqayn
doonin guddida doorashooyinka.
Barkhad-ladiif M. Cumar, Hiiraan Online
[email protected]
Hargeysa, Somaliland.