Faah faahin : Wasiirro iyo Xildhibaanno ka tirsan dowladda Soomaaliya oo lagu xayiray garoonka Joma Kenyatta
Talaado, May, 21, 2019 (HOL) - Wasiir ku –xigeenka Wasaarradda Tamarta iyo
Kheyraadka Biyaha Cismaan Libaax Ibraahim oo ka mid ahaa Wasiirro iyo
xildhibaanno ka tirsan dowladda Soomaaliya oo lagu xayiray garoonka diyaaradaha
Joma Kenyatta ayaa xaqiijiyay in warkaasi jiro, islamarkaana sugayaan sida uu
hadalka u dhigay diyaaradii ku celin laheyd Soomaaliya.
Dowladda Kenya ayaa dal ku gal u diidey Xubnaha
isugu jiray Wasiirradda iyo Xildhibaannada ka tirsan dowladda Soomaaliya, kuwaa
oo qorshuhu ahaa in ay saakay ka qeybgalaan shir ka furmi lahaa magaalada
Nairobi ee dalka Kenya oo ay si wada jir ah uga qayb galayaan QM, Midowga Yurub, IGAD, Soomaaliya, Itoobiya iyo dalka Kenya.
Cismaan Libaax waxaa uu sheegay in uusan
dooneynin uu bixiyo faaah faahin dheeraad, laakiin isaga iyo xubnaha kale ee la
socda sugayaan sida uu hadalka u dhigay diyaaradii ku celin laheyd dalka
Soomaaliya.
Dowlada Soomaaliya ayaan wali war rasmi ah ka soo saarin dhacdadan ay
la kulmeen xubnaha dowladda Soomaaliya matalayay.
Waxaa maalmihii ugu danbeeyayba jiray cadaadis
dowladda Soomaaliya uga imanayay dhinaca dowladda Kenya oo la xiriira dhinaca
isku socodka labada dal, iyadoo dhawaan Kenya ay amartay in diyaaradaha ka soo
duula garoonka Aadan Cadde soo maraan degmada Wajeer ee gobolka Waqooyi Bari si
baaritaan dheeraad ah loogu sameeyo.
Kenya ayaa u muuqatay in cadaadiska ku saarayso Soomaaliyadacwada
badda ee u dhaxeeysa labada dal oo la filayo dhowaan Maxkamadda Cadaalada ee Caalamiga ICJ inay go'aan ka gaarto, iyadoo Kenya marar badan oo hore ka dalbatay dowladda
Soomaaliya in ay dacwadaasi ka laabato.
C/raxmaan Diini,
Hiiraan Online
[email protected]