Arbaco, May, 01, 2019 (HOL)-Israel iyo Mareykanka ayaa cadaadis dhaqaale saaraya maamulka Falastiin sababo la xiriira diidmadooda qorshaha nabadda Bariga Dhexe ee Mareykanka uu wado.
Dadka taxliiliya siyaasadda gobolka ayaa sheegaya in sanadii tagtay
Mareykanka uu aad u jaray kaalmadii Falastiin, isaga oo isku dayaya inuu
ka cadaaddiyo aqbalaadda qorshaha Trump, oo Falastiiniyiinta ay
rumeysan yihiin inuusan u ogolaaneyn inay dal helaan.
Dhinaca kale, dowladda garabka midig ee ra’iisul wasaare Benjamin
Netanyahu ayaa maamulka Falastiin saartay cunaqabateeno qarka u saaray
xasarad dhaqaale.
Bishii Febraayo, Israel ayaa ku dhowaaqday inay 5% ka jarayso
dakhliga dhan 190-ka milyan ee ah canshuuraha ay ka qaaddo badeecadaha
laga soo dejiyo Daanta Galbeed iyo Marinka Gaza, taasi oo bil walba ay
ku wareejiso maamulka Falastiin.
Lacagtan ayaa u dhiganta tan bil walba uu maamulka Falastiin siiyo
ehellada dadka Israel ay xirto ee ku eedeysan weerarada ka dhanka
Yahuudda. Dadkaas ayaa maamulka u arkaa geesiyaal mudan in qoysaskooda
la taageero.
Bankiga Adduunka ayaa ka digaya in haddii aanu dhicin is-beddel deg deg ah, in dhinnaashaha miisaaniyadda maamulka Falastiin uu sanadkan gaari karo hal bilyan oo dollar.
Xigasho VOA
