Maxkamada ciidamada oo ugu danbeyntii go'aan ka gaartay Kiiska C/risaaq Xuseen Tahliil
Arbaco, May, 01, 2019 (HOL)-Maxkamadda sare ee Ciidamada qalabka sida ayaa ugu danbeyntii soo afjartay Kiiska C/risaaq Xuseen Tahliil oo loo yaqaano Ina Calool Geel, kaasoo labo jeer ay Maxkamad ku taal Puntland ku xukutay dil toogasho ah.
Cabdirisaaq ayaa sanadkii 2017 howlgal si wadajir ah u fuliyeen Ciidamada Danab iyo kuwa PSF ee Puntland ku qabteen Koofurta Gaalkacyo, waxaana Mareykanka uu ninkan ku eedeeyay inuu ka tirsan yahay Al-Shabaab.
Xafiiska Xeer Ilaalinta oo safar ku bixiyay baarista kiiskan ayaa
24-kii bishii Sedaxaad codsaday in la hor geeyo Maxkamadda sare ee
ciidamada qalabka sida, laba isbuuc kadib Maxkamadda Sare Ciidamada
Qalabka Side ayaa sedax jeer oo kala ah 6-13-27 bishii na dhaaftay u
fariisatay eedda Cabdirisaaq Xuseen Tahliil (Ina Calool Geelle).
Mudda 21-cisha ah oo ay Maxkamadda Sare kiiskan ku dhex jirtay, waxaa
ay Guddoonka Maxkamadda Sare Ee Ciidamada Qalabka Sida ku bixiyeen dadaal fara badan oo ah hubinta Eedda arga-gixisanimo ee Eedeysanaha u xirnaa weliba horay loogu soo xukumay balse buray markii ay aqbashay rafcaanka Maxkamadda Sare.
Ugu danbeyntii Shan cisho kaddib Maxkamadda Sare ee Ciidamada Qalabka Side ayaa go’aan ka soo saartay Cabdirisaaq Xuseen Tahliil, waxaana ay Maxkamadda Sare amartay in si deg-deg ah looga daayo xabsiga hadii aysan jirin dambiya kale, waxa ay sidoo kale amartay in uusan ka bixi Karin magaalada Muqdisho muddo 2-sano ah, ugu dambeyn Maxkamadda ayaa ku amartay ciidamada amniga in ay si gaar ah ula socdaan dhaq-dhaqaaqiisa ku dhawaad 5-sano iyo in uu todobaadkiiba mar iska diiwaan geliyo Xarunta Dambi Baarista Boliiska CID, sida uu u sheegay warbaahinta guddoomiyaha Maxkamadda Sare Ee Ciidamada Qalabka Sida jenaraal Liibaan Cali Yarow.
C/raxmaan Diini,
Hiiraan Online
[email protected]