Yaa ka qeybgalaya shirka la filayo in maalinta berri ah uu ka furmo magaalada Garoowe
Arbaco, May, 01, 2019 (HOL)- Maalinta berri ah oo ay
taariikhdu ku beegan tahay 02 bishan May ayaa lagu wadaa in magaalada Garoowe
uu ka furmo shirweyne uu ku baaqay madaxweynaha maamulka Puntland Saciid
Cabdullaahi Deni.
Madaxweynaha maamul gobolleedka
Puntland oo ayaa shirkan ku martiqaaday in ay ka soo qeybgalaan madaxda ugu
sareysa dalka sida madaxweynaha iyo ra’iisal wasaaraha, sidoo kale shirkan ayuu
ku casuumay madaxweyne Deni madaxweynayaasha maamul gobolleedyada Jubbaland,
Koonfur Galbeed, Galmudug iyo Hirshabeelle.
Madaxweynayaasha Jubbaland iyo
Galmudug ayaa la xaqiijinayaa in saacadaha soo socda gaari doonaan magaalada
Garoowe, waxeyna saddexda madaxweyne Puntland, Jubbaland iyo Galmudug horay
kulamo ugu soo yeesheen magaalada Nairobi ee dalka Kenya iyaga oo ku balamay ka
qeybgalka shrike magaalada Garoowe.
Laakiin ilaa iyo hadda ma jiro
wax war ah oo ka soo baxay dhinaca madaxda ugu sareysa dowladda federaalka oo
la xiriira ka qeybgalka shirka Garoowe, sidoo kale waxaan la hubin in ay Garoowe
tagi doonaan madaxweynayaasha Koonfur Galbeed iyo Hirshabeelle gacan saar dhaw la
leh dowladda dhexe ee federaalka.
Shirkan uu ku baaqay madaxweyne Deni ayaa
imanaya xilli uu dib u dhacay dhowr jeer oo ah
shirweyne uu ku baaqay madaxweynaha dowladda Soomaaliya, kaddib markii sida la
sheegay ay ka biyo diideen qaar ka mid ah madaxda dowlad gobolleedyda.
C/raxmaan Diini,
Hiiraan Online
[email protected]
