Dowladda Soomaaliya oo cadeysay mowqifkeeda ku aadan khilaafka Badda ee kala dhaxeeya Kenya
Arbaco, Maarso, 06, 2019
(HOL)- Iyadoo magaalada Nairobi ee dalka
Kenya uu ku sugan yahay madaxweynaha dowladda Soomaaliya Maxamed Cabdullaahi
Farmaajo oo uu wehliyo ra’iisal wasaaraha Itoobiya Abiy Ahmed, ayaa dhinaca
kale dowladda Soomaaliya waxaa ay mar kale ku celisay mowqifkeeda ku aadan
khilaafka xudduuda baddeedka ee kala dhexeeya Kenya.
Afhayeenka madaxtooyadda Soomaaliya, Cabdinur
Maxamed Axmed, oo ka mid ah wefdiga la socda madaxweyne Farmaajo ayaa bartiisa
Facebook ku sheegay in laga wadahadli doono sidii dib loogu soo celin lahaa,
loona xoojin lahaa xiriirkii diblomaasiyadeed ee u dhexeeya labada dal.
Waxa uu intaa ku daray in kiiska badda lagu
muransan yahay ee yaalla Maxkamadda Caddaaladda Adduunka aan wax gorgortan ah
laga geli doonin.
Xiisadda diblomaasiyadeed ee u dhaxeysa labada
ayaa meel xun gaartay, kadib markii dowladda Kenya ay Soomaaliya ku eedeesay in
London ay ku "xaraashtay" ceelal shidaal oo ku yaal xuduud badeedka
lagu mursan yahay.
Warka ka soo baxay madaxtooyada Soomaaliya ayaa
imanaya xili dad badani shaki ka muujiyeen socdaalka deg deg ah ee madaxweynaha
Soomaaliya uu ugu anbabaxay magaalada Nairobi, waxaana maanta lagu wadaa in
halkaa uu ka dhaco kulan saddex geesood oo dhaxmari doona madaxda dowladdaha,
Soomaaliya, Itoobiya iyo Kenya.
C/raxmaan Diini, Hiiraan Online
[email protected]
