Madaxweyne Farmaajo oo booqday dadkii ku dhaawacmay weerarkii Al-shabaab ee Maka Al-Mukarama
Isniin, Marso, 04, 2019 (HOL)- Madaxweynaha Soomaaliya Maxamed C/llaahi
Farmaajo ayaa saakay booqday Isbitaalka Madiina, si uu ugu kuurgalo xaaladda
caafimaad ee dadkii ku dhaawacmay qaraxyadii habeenkii Khamiista ka dhacay
magaalada Muqdisho, gaar ahaan wadada Maka Al-Mukarama.
Madaxweyne Farmaajo ayaa markii uu gaaray
Isbitaalka waxa uu warbixin faahfaahsan ka dhegaystay Agaasimaha Isbitaalka Dr.
Maxamed Yuusuf oo uga warramay xaaladda caafimaad ee ay ku sugan yihiin dadkii
qaraxa ku waxyeeloobay.
Sidoo kale Madaxweynaha ayaa intii uu ku sugnaa
Isbitaalka waxa uu mid mid u dul istaagay bukaannada iyo dhawaacayada lagu
daawaynayo Isbitaalka Madiina, isaga oo arkay xaaladdooda caafimaad.
Madaxweynaha ayaa uga mahadceliyey dhakhaatiirtii
uu kula kulmay Isbitaalka Madiina shaqada wanaagsan ee ay bulshada Soomaaliyeed
u hayaan, isagoo kula dardaarmay in ay sii dardargeliyaan daryeelka caafimaad
ee ay u fidiyaan bukaannada qaba dhaawacyada kala duwan.
Qarax-yadii habeenkii Khamiistii ka dhacay
Wadada Maka Al-Mukarama ayaa sababay khasaare fara badan oo isugu jira
dhimasho, dhaawac iyo burbur hantiyadeed oo u badnaa dhismayaal Ganacsi oo ku
dumay qaraxa.
C/raxmaan Diini,
Hiiraan Online
[email protected]
