Madaxweyne Biixi oo maanta daahfurey barnaamijka Carbiska dhallinyaradda ee shaqo Qaran
Axad, Marso, 03, 2019 (HOL)- Madaxweyne Muuse
Biixi ayaa maanta daahfurey barnaamijka carbiska dhallinta ee shaqo qaran oo
kamid ah tiirarkii halbawlaha u ahaa ballanqaadyadii xisbiga KULMIYE bulshada
la galay waqtiyadii ololaha.
Munaasibadda Daah-furka barnaamijka shaqo qaran
oo lagu qabtay deegaanka Darar-weyne oo hangarro waaweyn oo qalabaysan looga
dhisay dhallinyarada barnaamijkan ku guulaysatay, ayaa waxa ka qaybgalay
madaxweyne Biixi, shir-guddoonka golaha wakiillada, saddex kamid ah madaxweyne
ku xigeenadii dalka soo maray, hoggaanka axsaabta qaranka,
talliyayaasha ciidamada kala duwan ee qaranka, hormuudka jaamacadda Hargeysa,
xubno kamid ah golaha wasiirrada, safiirka dalka jabuuti u fadhiya Somaliland,
dhallinyarada ku gudo jirta barnaamijka carbiska ah ee shaqo qaran.
madaxweynuhu waxa uu kormeeray hangarrada jiifka,
cuntada iyo kuwa waxbarashada ee xukuumaddu u diyaarisay dhallinyarada ku jirta
barnaamijka carbiska shaqo qaran, halkaas oo lagu diyaariyey dhammaanba wixii ay
u baahnaayeen muddada ay halkaasi ku jiri doonaan.
Agaasimaha barnaamijka shaqo qaran, Maxamed
Xuseen Cismaan (Mu’addin), ayaa ku dheeraaday marxaladihii kala
duwanaa ee uu barnaamijkani soo maray iyo sida ay uga fikireen sidii uu
barnaamijkani u noqon lahaa mid mustaqbalka fog loo aayo oo midho wanaagsani
kasoo bixi karaan,waxana uu yidhi, “Maanta waa maalin weyn oo taariikhda
qaranka kamid noqotay oo ay inoo hirgashay himilo uu madaxweynaheennu horseed
inoogu ahaa oo aynnu hananay hammigii fogaa, soona noolaysay curfigii ahaa
maxaad taqaan oo saaxadda ka saaray ayaad taqaan. Waa maalin aynnu haloosiyeyno
hayaanka horumarka dhallinyarteenna.”
Waxaanu intaas ku daray “Barnaamujka shaqo qaran
waxa uu ka dhashay hindisihii iyo hal-abuurkii madaxweynaha ee ku aaddanaa
horumarinta iyo jihaynta dhallinyarada Somaliland, taas ayuuna kaga mid noqday
himilooyinkii ugu mudnaa ee uu xisbiga KULMIYE u ballan-qaaday dhallinta
Somaliland xilligii doorashada,”
Taliyaha ciidamada Militeriga, sarreeye gaas Nuux
Ismaaciil Taani iyo wasiirka wasaaradda gaashaandhigga, Mudane Ciise Axmed
Yuusuf oo munaasibadda ka hadlay, ayaa da’yarta barnaamijka carbiska shaqo
qaran ku dhiirrigeliyey inay ka midho dhaliyaan dedaalka iyo waqtiga la
geliyey, isla markaana lafahooda iyo qarankoodaba uga faa’iideeyaan.
Guddoomiyaha ku-meel-gaadhka ah ee xisbiga
WADDANI, Xildhibaan Cabdiqaadir Xaaji Ismaaciil Jirde oo munaasibadda hadallo
kooban ka jeediyey, ayaa taageeray barnaamijka shaqo qaran ee lagu carbinayo
dhallinyarada jaamacadaha dalka kasoo baxday, waxana uu dhallinyarada
barnaamijka ku jirta kula dardaarmay inay maanka ku hayaan abaalka iyo
dedaalka uu qaranku geliyey, una dhabar -adaygaan caqabadaha kaga
yimaadda ka midho dhallinta hammigooda.
Guddoomiyaha xisbiga mucaaridka ah ee UCID, Eng.
Faysal Cali-waraabe, ayaa barnaamijka shaqo qaran ku tilmaamay tallaabo
da’yarta faa’iido badan u leh, kana baajin karta tahriibkii iyo
niyadjabkii soo wajihi jirey, waxana uu caddeeyey inay si buuxda u
garab taagan yihiin hirgelinta barnaamijkan iyo ka midho-dhalintiisaba.
Guddoomiyaha golaha wakiillada Somaliland, Mudane
Baashe Maxamed Faarax, ayaa isaguna soo dhaweeyey mashruuca shaqo qaran ee
da’yarta dalka looga faa’iidaynayo, waxana uu dhallinyarada kula dardaarmay
inay u samraan muddada uu tababarku socdo oo aanay dhib u arkin.
Madaxweyne Biixi oo soo soo gabogabeeyey xafladda
ayaa bogaadiyey cid kasta oo ka qaybgashay hirgelinta barnaamijkan iyo ka
midho dhalintiisa, isaga oo guul ku tilmaamay inuu mashruucani hirgalay iyada
oo aanay jirin gacan dibadeed oo ina caawisay, isla markaana uu tusaale
wanaagsan u yahay in isu-tagga bulshada lagu gaadhi karo guulo waaweyn oo
taariikhi ah.
Madaxweynuhu oo arrintan ka hadlaya waxa uu yidhi
“Qorshaheennu waa inuu barnaamijkani noqdo mid waligii jira oo qaranku ka
dhismo oo uu noqdo mid qaranka la socda oo aannu noqonin mid halkaas ku
ekaada oo hoggaaminta dalka iyo ragga siyaasadda hoggaamin doonaa ka
dhismaan oo ay diblomaasiyiintu ka dhismaan oo ay hablaha dhakhtarrada ah ee
ugu waaweyni ka dhismaan, taasina waxa ay ku imanaysaa qaranka oo dhan oo iska
kaashada oo la arko muhiimadda uu leeyahay,”
“Waxad halkan ku baranaysaan oo la doonayaa
inaad erayga ah ANIGA ka baxdaan oo aad ku beddeshaan INNAGA, markaas uun
baynu wax noqon karnaa, markaad innaga tihaahdaana waxay noqonaysaa inaad
mar walba eegto maxaad ummadda u qabataa.”ayuu hadalkiisa raaciyey.
Ujeeddada barnaamijka carbiska shaqo qaran laga
leeyahay ayaa waxa kamid ah, dhiirrigelinta dhallinyarada iyo kor u qaaddida
dhaqanka mutadawacnimada iyo iskafaalo-qaadka bulsheed , sugidda caddaaladda
iyo u sinnaanta bulshada ee fursadaha shaqada, tababarka iyo shaqo-gelidda,
waxana loogu talo galay dhallinyarada muwaadiniinta ah ee kasoo qalinjabisa
jaamacadaha dalka iyo kuwa dibadda, ka qaybgalkiisuna waa ikhtiyaari.
Barkhad-ladiif M. Cumar, Hiiraan Online
[email protected]
Hargeysa, Somaliland