Axad, Marso, 03, 2019 (HOL)- Agaasimaha cusub ee
Telefishanka qaranka Somaliland ayaa loo magcaabay Ruug-cadaaga weyn ee
Maxamed Cali Weji oo muddo ka badan konton sanno bahda warbaahinta ku jiray.
Wasiirka warfaafinta Cabdiraxmaan Guri-barwaaqo ayaa
xilkii ka qaaday agaasimihii Telefishanka qaranka Muuse Jaambiir, waxaana
lagu bedelay Maxamed Cali Waji oo ah suxufi muddo dheer aan marna wax xil ah
loo magacaabin, taas ayaa keentay in bahda saxaafaddu si weyn usoo dhoweyso.
Maxamed Cali Weji oo madal dood ahayd ka hadlaya sababta
marna xil loogu magacaabi waayey waxa uu yidhi " 50 sanno ayaan Suxufi
ahaa, ma jirin cid iga cod wanaagsan iyo cid iga karti badan hadana weligay Xil
la iima magacaabin oo maan dalicin, dhalinyaro nimadaydii halkaan taagnaa ayaan
weli taagnahay, wax kalena la iiguma diidin, la igamana aqoon badnayne ee waxa
la igaga badiyey waa nidaamka u xun ee qabyaaladda”
Maxamed Cali Waji ayaa ah suxufi mihnada ku jiray muddo
dheer, isla markaana barmaajyo xiiso leh ku leh Idaacadda Radio Hargeysa.
Suxufi Maxamed Cali Waji wuxuu ka mid yahay golaha
Abwaanadda Somaliland,isla markaana waxay hore u xaliyeen khilaaf soo kala
dhexgallay saddexda xisbi oo ay goob kaliya iskugu keeneen gudoomiyeyaasha
saddexda xisbi, waxaanay kolba ka hadlaan xaaladda taagan iyo sidii looga bixi
lahaa khilaafaadka yimaadda..
Barkhad-ladiif M. Cumar, Hiiraan Online
[email protected]
Hargeysa, Somaliland.
