Axad, Marso, 03, 2019 (HOL)-Madaxweynaha Kenya Uhuru Kenyata iyo Ra’iisal wasaaraha Itoobiya Abiy Ahmed ayaa maanta gaaray magaalada Asmara ee dalka Etirea.
Waxaa halkaasi ku soo dhoweeyay Madaxweynaha dalka Eritrea Isaias Afwerki iyo xubno ka tirsan dowladiisa.
Saddexda hoggaamiye ee isugu tegay magaalada Asmara ayaan faafhaahin
badan laga bixin qorshahooda, balse Wasiirka Warfaafinta Eritrea Yemane
Gebre Meskel ayaa sheegay in shirka saddex geesoodka ah ay uga hadli
doonaan arrimaha Gobolka, ayna jiri doonaan shirar kala gaara oo ay
yeelan doonaan.
Hore waxaa magaalada Asmara kulamo saddex geesood ah ugu yeeshay
madaxda Somalia, Itoobiya iyo Eritrea, taasoo ay walaac ka muujisay
dowladda Kenya, waxaana hadda muuqata in madaxweynaha Kenya uu qaaday
tallaabo diblomaasiyadeed kadib markii uu booqasho rasmi ah ku tegay
dalka Itoobiya.
Kulan saddex geesoodka ah ee ay asmara iskugu tageen hogaamiyeyaasha
dalalka Itoobiya, Kenya iyo Eritrea ayaa shaki badan gelinaya madaxda
sare ee dowlada Somalia, maadaama uu ku soo aaday xili dhowaan uu
xumaaday xiriirka dowladaha Somalia iyo Kenya.
C/raxmaan Diini,
Hiiraan Online
[email protected]