Shir magaalada Garoowe dhawaan uga furmaya guddoomiyayaasha Baarlamaannada dowlad gobolleedyada
Jimco, Maarso, 29, 2019 (HOL) – Xoghayaha Golaha Shacabka
Soomaaliya Cabdikariin Xaaji Axmed Buux ayaa warbaahinta u sheegay in uu jiro
shir dhawaan la filayo in magaalada Garoowe ku yeelan doonaan guddoomiyayaasha
Baarlamaannada dowlad gobolleedyada dalka.
Wuxuu sheegay in shirkan uu noqon
doono mid xog is dhaafsi iyo aqoon korarsi u badnaan doona, madaama ayuu yiri
lagu kala gadisan yahay qibrada iyo mudada Baarlamaannadu soo dhisnaayeen.
Xoghayaha ayaa sidoo kale sheegay
in shirkani uu noqon doono mid looga tashanayo tababarada Xildhibaanada iyo
Shaqaalahooda, is-xogwareysi ku aadan baahiyaha ay qabaan Xildhibaanada federaalka
iyo kuwa dowlad Goboleedyada.
‘’Shirkan kii ka horeeyay waxaa
lagu qabtay magaalada Baydhabo ee xarunta gobolka Baay, kan xigana waxaa leysku
raacay in uu ka furmo magaalada Garoowe ka hor bisha Ramadaan’’ ayuu yiri
Cabdikariin Buux.
Wuxuu ugu danbeyntii sheegay in
shirkaasi uu noqon doono mid wax weyn taraya isku xirnaanta iyo wada shaqeynta
baarlamaannada dowlad gobolleedyada iyo kan guud ee federaalka iyo dhinac walba
uu ku biiriyo dhinaca kale qibradiisa shaqo.
C/raxmaan Diini,
Hiiraan Online
[email protected]