Xildhibaan ka tirsan dowlad deegaanka Soomaalida oo labo ruux ku dilay gobolka Jarati
Khamiis, Maarso, 28, 2019 (HOL)–Guddoomiyaha Gobolka Jarati ee dowlad deegaanka Soomaalida Saafi Diiriye Shaafi ayaa faah faahin dheeraad ah ka bixiyay toogasho xildhibaan ka tirsan dowlad deegaanka Soomaalida oo lagu magacaabo Bashiir Diiriye Camey uu ku dilay Labo ruux oo Shacab ah maalintii shalay
Guddoomiyaha ayaa sheegay in
toogashadan uu geystay xildhibaanka ay la xiriirtay muran muddo dheerba soo
jiitamayay oo salka haya lahaasha dhul-beereed ku yaala degmada oo xildhibaanku
ay siisay xukuumaddii uu hoggaaminayay Cabdi Maxamuud Cumar.
‘’Doodda xildhibaanka iyo
dadka shacabka ah ee beerta isku hayay muddo dheerba wey soo soctay, waxaan u
sheegnay in ay sharciga ku kala baxaan, laakiin ugu danbeyntii falkan ayaa
dhacay oo xildhibaanku uu ku toogtay labada ruux,’’ ayuu yiri guddoomiyaha
gobolka Jarati.
Wuxuu intaa ku daray in ay
gacanta ku dhigeen xildhibaanka iyo qof kale oo la socday oo sida uu hadalka u
dhigay watay gaari nooca Bajaajka ah.
‘’Inkastoo xildhibaanku uu
xasaannad leeyahay haddana haddii faldanbiyeed lagu qabto waa la xirayaa, sidaa
daraadeed waan qabanay gacanta laamaha Amniga ku jiraa’’ ayuu yiri guddoomiye
Saafi.
Xukuumaddii hore ee Cabdi
Maxamuud Cumar ayaa lagu eedeynayaa in dhul ay Shacabku leeyihiin siisay
xildhibaanno iyo mas’uuliyiin ka tirsanaa maamulkiisa, kuwaa hadda doonaya in
dib dhulkoodii ay u helaan.
C/raxmaan Diini,
Hiiraan Online
[email protected]
