Arbaco, Maarso, 27, 2019 (HOL)- Roobabkan oo saacadihii aan soo
dhaafnay siyaabo kala duwan uga curtay dhulka oomanaha ah ee koonfurta iyo
galbeedka gobolka Sool oo xaalad biyo la'aan ahi ka taagnayd.
Deegaannada Qorilay oo dhaca K/bari
degmada Laascaanood ayaa dhibicdii u horaysay ka daroortay gabal gaabkii
shalay, halka degaano ku dhowdhowna ay hoglo ka da'een.
"Mar keliya ayay waxwaliba is
bedeleen, kulayl ayaan joogi waayey banaanka ayaan u baxay waxaana arkay daruur
maja-haadlaysey oo nagu soo beegan qaylaan aflabadii yeedhay baahida jirtey
darteed" sidaa waxaa yidhi Maxmuud Cali oo ku sugan Qoriley.
Sidoo kale roobabku waxay ka curteen
magaalad Buuhoodle iyo degaano hoos yimaada, kuwaas oo lagu sheegay kuwo lagu
doogsadey.
Si kastaba ha ahaatee roobabkan
curtay ayaa naruuro u ah dad iyo duunyo la daalaadhacayey abaar inkasta oo
degaanadii labada sano roob la'aantu ka jirtey aysan weli dhibic ku tiixin
hadana curashadiisa ayaa naruuro u ah.
Seynab Cabdi Warsame
seynab@hiiraan
Laascaanood G. Sool