Guddida doorashooyinka Somaliland oo sheegay in aanay jirin sabab ay isku casilaan
Talaado, Maarso, 26, 2019 (HOL)- Gudoomiyaha guddida
doorashooyinka Somaliland Cabdiqaadir iimaan ayaa ka hadlay hadal ka soo
yeedhay gudoomiyaha dalladda aan dawliga ahayn ee SONSAF oo soo jeedisay inay
guddida doorashooyinku is casilaan.
Guddoomiye Iimaan ayaa sheegay in muddo
xileedkoodu aanu ka dhamaan, isla markaana aanay jirin sabab ay isku casilaan,
waxaanu ku eedeeyey gudoomiyaha dalladda aan dawliga ahayn ee SONSAF inay ka
hor yimid xeerarka dalka u yaalla oo isagoo xog ka helin dhinacyadii ay
khuseysay warbaahinta ka sheegay inay kuraasta baneeyaan guddida
doorashooyinka.
“waxa ka muuqatay gudoomiyaha dalada Sonsaf
caqabadaha hor yaalla inay doorasho dhacdo inaanu fahansanayn, waxa doorashada
loo mudeeyey 12 December 2019-ka, guddida doorashooyinku wuxuu ku
aasaasan yahay sharci iyo xeerar aan la baalmari Karin.”ayuu yidhi gudoomiye
iimaan oo ka jawaabay hadal ka soo yeedhay dallada ururada bulshada.
Waxaanu intaas raaciyey “Gudoomiyaha dalada aan
dawliga ahayn ee SONSAF waxa uu leeyahay guddi aan mudo xileedkoodu dhamaan ha
baneeyaan kuraasta, iyagu maaha kuwo lagaga tashanayo arrimaha komishanka
doorashooyinka waxay ahayd inuu garto xeyn daabka sharci ee isaga ku
hareeraysan.”
Sidoo kale, gudoomiye Iimaan waxa uu
sheegay inuu ka been abuurtay gudoomiyaha gudoomiyaha dalladda SONSAF
dhinacyaddii ay komishanka doorashooyinku la kulmeen sida gudoomiyaha
guurtidda, madaxweynaha iyo xisbiyadda qaranka, isagoo arrintaasi ka hadlaya
waxa uu yidhi “Wuxuu been fariimay gudoomiyaa golaha guurridda oo hadal
aanu odhan ka yidhi , guddida doorashooyinka wuu been fariimay, wuxuu yidhi
xisbiyadu wada shaqayn lama laha guddida doorashooyinka isaga waxaas oo dhan
laga raba inuu cadeeyo halka uu ka keenay”
Dalladda aan dawliga ahayn ee ururada bulshada ee
loo yaqaan SONSAF ayaa soo jeediyey in guddidia doorashooyinku is casileen si
loo soo magacaabo guddi cusub oo doorashada dambe hirgaliya, haseyeeshee
guddida doorashooyinka ayaa ku dooday in aanay wali dhamaan muddo xileedkoodda
sidaas darteed aanay isku casili Karin.