Madaxweyne Farmaajo : Dalka waxaa heysta cadaw shisheeye oo ay u adeegayaan dad Soomaali ah
Talaado, Maarso, 26, 2019 (HOL)- Madaxweynaha
dowladda Soomaaliya Maxamed Cabdullaahi Farmaajo oo khudbad u jeedinayay
saraakiisha ciidamada xoogga dalka Soomaliyeed ayaa sheegay in dalku uu wajayo
labo cadaw oo is biirsaday, kuwaa oo ka shaqeynaya sida uu hadalka u dhigay
burburinta dalka.
Madaxweyne Farmaajo ayaa sheegay in cadawga
dibadda ay adeegsanayaan dad Soomaali ah oo ujeedada laga leeyahay tahay in
marnaba uusan dalkani degin, islamarkaana la helin dowlad awood leh.
“Runtii
Soomaaliya waxaa heysta cadaw aad u fara-badan mid dibadeed iyo mid gudaha,
midka dibada soomaaliya inay istaagto lama rabo sidaan inaan ku jirno ayaa la
rabaa, maxaa yeelay meesha aan ku naalo iyo nimcada aan heysano nalooma ogola, aduunka oo dhan waxa alla wixii kaa awood
badan waxa ay rabaan in ay ku maamulaan iyaga ayaa ku dagaalamaya waliba sidii
ay kuu maamuli lahaayeen, waxaa shaqada u qabanaya dad Soomaalyeed oo waliba
muwaadiniin ah si aan marnaba xasilooni loo helin ayuu yiri Madaxweyne
Farmaajo.
Wuxuu
sheegay in arrimahaa oo dhan looga gon-leeyahay in meel leyska dhiggo qabkii
iyo damiirkii Soomaalinimada oo wax kasta aad Haa tiraado.
Hadalka
madaxweynaha ayaa imanaya xili dowladda federaalka ay waheyso culeysyo dhinacyo
badan uga imanaya, gaar ahaan marka laga hadlayo amniga gudaha oo u muuqda mid
aan wanaagsaneyn, iyadoo ay kordhayaan weerarrada Al-shabaab ay ka geysanayaan
magaalada Muqdisho.
C/raxmaan Diini,
Hiiraan Online
[email protected]