Wasiir Maareeye oo ka hadlay madaafiic ku soo dhacday maanta xarunta Wasaarradda Ganacsiga
Sabti, Marso, 02, 2019 (HOL)- Wasiirka Wasaarradda
Ganacsiga iyo Warshadaha Soomaaliya Maxamed Cabdi Xayir Maareeye ayaa faah
faahin dheeraad ah ka bixiyay madaafiic loo adeegsaday qoriga hoobiyaha oo
maanta ku soo dhacay qeybo ka mid ah xarunta Wasaarradda.
Wasiirka ayaa sheegay inuu jiro khasaare burbur oo
soo gaaray mid ka mid ah xafiisyada Wasaaradda oo ku dhacay madfac hoobiye,
isagoo xusay in aanu jirin khasaare nafeed.
“Madaafiicdan dib uma celin karaan rajada aynu ka
qabno in aynu helno Nabad iyo Nolol fiican, waxay doonayaan in ay rajo beel
inaga dhigaan oo hakiyaan horumarka, Ganacsiga, Maalgashiga iyo yididiilada
jirta, ka yeeli mayno waana la ciqaabi doonaa argagixisada insha allah”ayuu
yiri Wasiir Maareeye.
Ilaa shan madfac oo maanta lagu weerarray xarunta madaxtooyada Soomaaliya
ayaa qaar ka mid ah waxaa ay ku dhaceen xarunta Wasaarradda Ganacsiga iyo qeybo
kale oo ka mid ah isla madaxtooyada Soomaaliya.
Al-Shabaab ayaa sheegatay mas’uuliyadda weerarka
madaafiicda ee ku qaaday Xarunta Madaxtooyada Villa Somalia, waana weerarkii labaad
oo Al-Shabaab ka fuliso Muqdisho labo maalin, kaddib weeraro ku bilowday
qaraxyo oo habeenkii khamiistii ka dhacay Wadada Maka Al-Mukarama.
C/raxmaan Diini, Hiiraan Online
[email protected]
