Sabti, Marso, 02, 2019 (HOL)- War ka soo baxay Qaramada Midoobey ayaa si
adag loogu cambaareeyay weerarradii qaraxyada ku bilaawday ee ka dhacay
magaalada Muqdisho.
Xoghayaha Guud ee Qaramada Midoobay, Antonio Guterres, ayaa waxa uu ku
baaqay in la xoojiyo dagaalka ka dhanka Al-Shabaab.
“Xog-hayaha Guud waxaa uu si adag u
cambaareynayaa weerarradii ka dhacay magaalada Muqdisho, kuwaas oo ay ku
naf-waayeen tiro badan oo dad rayid ah ayna ku dhaawacmeen qaar kale oo badan.
Waxaa uu tacsi tiiraanyo leh u dirayaa qoysaska dadkii ku waxyeeloobay, iyo
shacabka iyo Dowladda Soomaaliya, waxaa uuna sidoo kale boogaadinaya jawaab
celintii ciidamada ammaanka ee Soomaaliya” ayuu yiri Stéphane Dujarric,
Af-hayeenka Xog-hayaha Guud
Xog-hayaha Guud waxaa uu mar kale xaqiijinaya in
Qaramada Midoobay ay si buuxda ugu taageerayso hay’adaha Soomaaliyeed dagaalka
ay kula jiraan argagixisada iyo dadaalkooda ku aaddan in Soomaaliya ay noqoto
dal nabad ah oo xasilloon.
Dhinaca kale dowladdaha Qoraalo ka soo kala baxay
dowladaha Sucuudiga, Turkiga, Qatar iyo Jabuuti ayaa loogu tacsiyadeeyay
dowladda Soomaaliya qaraxyadaas, waxaana ay ku eedeeyeen Argagixisada inay
laayeen dad shacab ah.
Dowladda Turkiga ayaa sheegtay inay garab taagan
tahay dowladda Soomaaliya, isla markaana mar walba gacan ka geysaneyso gurmadka
loo fidinayo dadka Soomaaliyeed.
C/raxmaan Diini, Hiiraan Online
[email protected]