Sabti, Marso, 02, 2019 (HOL)- War qoraal ah oo lagu baahiyay bogga Twitter –ka
ee taliska Mareykanka Africom ayaa lagu sheegay in duqeyn diyaaradaha
Mareykanku ka fuliyeen maalin ka hor deegaanno ka tirsan gobolka Hiiraan lagu
dilay 26 dagaalyahan oo ka tirsan ururka Al-shabaab.
Duqeyntan ugu danbeysay oo diyaaradaha Mareykanku ka fuliyaan gobolka
Hiiraan ayaa dhacday 28kii bishii Feberaayo, waxaana ay qeyb ka noqoneysaa
duqeymo horey sidan oo kale isla gobolka lagu bartilmaameedsaday xoogagga
Al-shabaab.
Mareykanka ayaa sheegay in ay
xoojinayaan weerarrada ka dhanka ah Al-shabaab iyaga oo gacan militari siinaya
ciidamada dowladda Soomaaliya.
Marka laga soo tago tiradan danbe ee 26ka ah, taliska Mareykanka ayaa horey u sheegay in 55 dagaalyahan oo Al-shabaab ah ku dileen labo duqeyn oo is xigtay oo laga fuliyay gobolka Hiiraan.
Gobolka Hiiraan qeybo ka mid ah
waxaa fariisimo xoogan ku leh dagaalyahanno ka tirsan Ururka Al-shabaab, hasse
ahaatee labadii cisho ee la dhaafay warar soo baxaya waxaa ay sheegayeen in ay
faarujiyeen deegaanno markii hore ay gacanta ku hayeen iyaga oo baxsanaya
duqeymaha diyaaradaha Mareykanka.
C/raxmaan Diini, Hiiraan Online
[email protected]