Isniin, Maarso, 11, 2019 (HOL) – Guddoomiyaha
Gobolka Banaadir ahna duqa Muqdisho Eng, C/raxmaan Cumar Cismaan Yariisow ayaa
shir jaraa’id uu ku qabtay magaalada Muqdisho waxa uu amray in laga guuro
xaruntii Ciidamada Badda Ex Mariino & Gurigii Taliyaha Ciidamada Badda oo
ku yaalla degmada CabdulCasiis ee Gobolka Banaadir.
Eng Yarisow ayaa sheegay in markii uu arkay
baahida deg dega ah ee loo qabo in safaaradaha iyo diblumaasiyiinta loo asteeyo
goobo ay ku howlgallaan uu soo saaray xeer dadka degan looga saarayo xaruntii ciidamada
Badda iyo guriga taliyihii ciidanka Badda Soomaaliya
“Waxaa la ogeysiinayaa ama lagu wargelinayaa cid
allaala iyo cidii ay quseyso in Xaruntii ciidamada Badda iyo Guryihii taliyaha
ciidanka badda loo asteeyay Goob ama deegaan diblumaasi ah, dhulkaas oo markii
hore ahaa dhul dowladeed,qorshaan ayaa u jeedadiisu tahay in caasimadda ay la
tartanto caasimadaha caalamka, waxana dib lagala noqday dadkii dukumuntiyada u
heystay maadama uu ahaa dhul dowladeed.
Waxaa uu sheegay in cid allaala cidii amarkaan
jebisay ama diida tallaabo sharci ah laga qaadi doono, waxana uu sheegay in
xarumahaas ay Guryo waa-weyn oo dabaqyo ah ay ka dhisteen Saraakiil ka tirsan ciidamada
Qalabka sida ee Soomaaliya.
Horay ayaa guddoomiyaha Gobolka Banaadir ahna
duqa Muqdisho waxa uu amray in la burburiyo Goobaha Darjiinooyinka ay ku yaalla
Muqdisho oo uu sheegay in tartan furan aan loo gelin dad gaar ahna la siiyay, hayeeshee
amarkaas uusan weli dhaqan gelin.
C/raxmaan
Diini, Hiiraan Online
[email protected]
