Taliska Booliiska Soomaali oo ka hadlay saddex ruux oo gaadiidka AMISOM la jiirsiiyay
Jimco, June, 28, 2019 (HOL) –Taliska
ciidamada Booliiska dowladda Soomaaliya ayaa faah faahinno dheeraad ah ka
bixiyay dhimashada saddex ruux oo labo ka mid ahaayeen Askar ka tirsan
ciidamada dowladda oo gaari ay la socdeen uu dul maray mid ka mid ah gaadiidka
gaashaaman ee ciidamada howlgalka AMISOM.
Taliyaha Ciidamada Ilaalada
waddooyinka Gen Maxamed Xusseen Madaale oo warbaahinta la hadlay ayaa sheegay
in saraakiisha AMISOM qirsan yihiin falkaasi dhacay iyo in mid ka mid
gaadiidkooda uu dilay saddex ruux oo Soomaali ah kuwaa oo labo ka mid ah
ahaayeen askar ka tirsan ciidamada dowladda halka qof kalana uu ahaa darawal.
Gaariga falkan geystay Number
kiisu ahaa 3660, ayuu sheegay in markii danbe ay qabteen isla ciidamo kale uu
ka tirsan ku dowladda oo ku sugnaa meel
aan ka fogeyn halka uu falka ka dhacay dulleedka magaalada Muqdisho, iyaga oo
qabashada kaddibna qirtay in ay falkaasi geysteen sida uu hadalka u sheegay
taliye Madaale.
‘’Markii gaarigooda la qabtay
waxey sheegeen in falkaasi dhacay, islamarkaana aysan aheyn dad sharciga ka
baxsanaya, laakiin sababtay ay goobta uga soo carareen aheyd in iyaga oo ka
cabsi qabay in dad ka careysan falka
dhacay ay soo weeraraan’’ ayuu yiri taliyaha ciidamada Ilaalada wadooyinka
dowladda Soomaaliya.
Wuxuu sheegay in wali ay socdaan
baaritaanno la xiriira sida uu shilku dhacay, hasse ahaatee waxaa uu dhinaca
kale intaa ku daray in AMISOM diyaar u
tahay in qoysaska ay dadkaasi ka soo jeedeen kala xaajoodaan dhacadan.
Ma’aha markii ugu horeysay oo
sidan oo kale gaadiidka AMISOM dad shacab ah ku dilaan magaalada Muqdisho iyo
deegaannada ka baxsan, iyaga oo xowli dheereeya ku mara jidadka magaalada.
C/raxmaan Diini, Hiiraan Online
[email protected]
