Shir maanta uga furmi lahaa Somaliland iyo Soomaaliya magaaladda Nayroobi oo baaqday
Talaado, June 25, 2019 (HOL) – Kulan lagu sii anbo qaadayey wada
hadaladii u socday Somaliland iyo Soomaaliya oo maanta loo balansanaa
magaaladda Nayroobi ayaa baaqday ka dib markii weftigii ka socday Soomaaliya
aanay ka soo qaybgalin.
Shirkan waxa saaka ku kaliyeysta
weftigii Somaliland ka socday oo ay ku wehelinayeen beesha caalamka doonaysay
inay goobjooga ka noqonayey dib u furitaankii wada hadaladii labadda dhinac u
socday oo muddo dhawr sanadoood aan la isku iman.
Wasiirka Arrimaha Dibada
Somaliland Yaasiin Farotoon oo warbaahinta la hadlay ayaa sheegay in dhanka
Soomaaliya ka baaqday shirkaasi,isla markaana weftigii ka socday Soomaaliya
lagu wargaliyey in aanay ka qaybgalin shirkaasi wakhti saacado kooban uu ka
hadhsanaa wakhtigii la bilaabi lahaa shirka.
Wasiirku waxa uu sheegay in
markasta ay iyagu diyaar u yihiin inay la hadlaan Soomaaliya, haseyeeshee waxa
uu dhinaca Soomaaliya ku eedeeyey in aanay daacad ka ahayn wada hadaladaasi.
Dhinaca weftiga Soomaaliya ka
socda oo uu hogaaminayey agaasimaha madaxtooyada Soomaaliya Nuur Diiriye ayaa
isagu ku qoray boga uu ku leeyahay baraha bulshada qoraal uu ku sheegay in
aanay kulankaasi ka qaybgali doonin, balse ay ka qaybgali doonaan marka meel ku
haboon iyo ajandaha shirka la isla fahmo.
Shirkan ayaa ahaa mid farsamo oo
lagu diyaariyey wada hadaladda la filayey inay u bilowdo labadda dhinac, taas
oo muddo dheer la sugayey.
Barkhad-ladiif M. Cumar, Hiiraan
Online
[email protected]
Hargeysa, Somaliland