Madaxweyne Biixi oo laalay xaaladdii degdeg ahayd ee uu ku soo rogay qaybo ka mid ah gobolka Sanaag
Talaado, June, 25 2019 (HOL)- Madaxweynaha Somaliland Muuse
Biixi ayaa maanta wareegto ku soo saaray inuu laallay xaaladdii degdega ahayd
ee uu ku soo rogay deegaannada
Ceerigaabo, Ceel-afweyn iyo Gar-adag oo ka tirsan gobolka Sanaag.
“Madaxweynaha Somaliland, Mudane
Muuse Biixi Cabdi waxa uu wareegto madaxweyne oo summadeedu tahay
JSL/XM/G/WAG/WG/ CQS/081/4/224/ 234/037-332/062019, uu ku laalay xaaladii
deg-dega ahayd ee hore loogu soo rogay Degmooyinka Gar-adag, Ceel Afweyn iyo
Ceerigaabo.”ayaa lagu yidhi qoraal ka soo baxay xafiiska madaxwyne Biixi.
Qoraalka wareegtadan waxay u
qornayd sidan:
Ujeedo: Laalis Xaalad Deg-deg ah
Ku: Shir-guddoonka Golaha
Guurtida Hargeysa
Ku: Shir-guddoonka Golaha
Wakiillada Hargeysa
Ku: Wasiirka Wasaaradda Arrimaha
Gudaha Hargeysa
Ku: Wasiirka Wasaaradda
Gaashaan-dhiga Hargeysa
Ku: Taliyayaasha Ciidammada
Qaranka Hargeysa
Markaan Arkay: Dastuurka
Jamhuuriyadda Somaliland, Qodobka 92aad;
Markaan Arkay: In lagu guulaystay
dejinta iyo gacan ku qabashada xaaladdii nabad-gelyo darro ee ka dhacday
Degmadda Ceel Afweyn;
Markaan Arkay: In Ciidammada
Qaranku ay gacanta ku soo dhigeen ciddii gaysatay iyo dhammaan dadkii ku lugta
lahaa falalkii foosha xumaa ee lagu dilay saraakiishii Ciidammada Qaranka iyo
dilalkii kale ee ka dhacay degmadaasi;
Markaan La-tashaday Taliyayaasha
Ciidammada Qaranka iyo Hay’adaha Ammaanka ee ay khusayso;
Waxaan Go’aamiyey;
1) In aan laalay Xaaladdii
Deg-degga ahayd ee lagu soo rogay Degmooyinka Gar-adag, Ceel Afweyn iyo
Ceerigaabo ee muddadeedu saddexda bilood ahayd.
2) In dhammaan dadkii gaystay fal-dambiyeedyadaasi
foosha xun iyo cid kasta oo gacan ku siisay oo u xidhan arrimahaasi sida ugu
dhakhsaha badan loo hor-geeyo sharciga.”,
Xaalada degdega ahayd ee lagu soo
rogay qaybo ka mid ah deegaanka gobolka Sanaag waxa ka hor yimid labada gole
baarlamaan ee Somaliland, taasina waxay keentay in maanta madaxweynuhu dib uga
noqdo go’aankaasi xaalada degdeg ah.
Barkhad-ladiif M. Cumar, Hiiraan Online
[email protected]
Hargeysa, Somaliland.