Talaado, June, 25, 2019 (HOL) – Madaxweynaha dowlada dowlad
gobolleedka Galmudug Axmed Ducaale Geelle Xaaf ayaa dib ugu laabtay degmada
Cadaado kaddib khilaaf soo kala dhaxlagay isaga iyo maamulkii gobollada dhexe
ee Ahlu Sunna oo markii hore ay ku midoobeen Galmudug.
Xaaf ayaa xalay gudaha u galay degmada Cadaado kaddib markii
isaga iyo gaadiid dagaal oo uu watay ay ka soo dhaqaaqeen dhinaca deegaanka
Godinlabe oo labadii cisho ee la soo
dhaafay ay ku sugnaayeen.
In madaxweyne Xaaf uu dib ugu
laabto degmada Cadaado waxaa ka shaqeeyay oo qeyb ka ahaa xildhibaanno ka
tirsan Baarlamaanka federaalka oo ka soo jeeda degmada, kuwaa oo xalay kulamo
waqti badan qaatay la yeeshay madaxweynaha.
Dhinaca kale degmada
Dhuusa-Mareeb ee gobolka Galguduud waxaa ku sugan ra’iisal wasaaraha xukuumadda Soomaaliya Xassan Cali Kheyre oo
shalay galinkii danbe ee gaaray halkaa, waxaana uu kulamo la leeyahay mas’uuliyiinta
sar sare ee maamulka Ahlu Sunna Waljameeca.
Shirarkan ka kala socday
degmooyinka Dhuusa-Mareeb iyo Cadaado ayaa u muuqda kuwo sii murjinaya xaalada
maamulka Galmudug oo hadda u muuqda mid sii kala furfuranaya, iyadoo dowladdu
ku adkeysaneyso in doorashada maamulkaasi la qabto 4ta bisha July ee nagu soo
foolka leh.
C/raxmaan Diini, Hiiraan Online
[email protected]
