Faysal Cali Waraabe oo ku baaqay in la joojiyo wada hadaladii Somaliland iyo Soomaaliya
Sabti, July, 06, 2019 (HOL)-Gudoomiyaha xisbiga mucaaradka ah ee UCID ayaa sheegay inay soo dhoweynayaa guulihii uu madaxweyaha Somalialnd ka gaadhay inuu qadiyada Somaliland gaadhsiiyo galbeedka Afrika,isla markaana muxaafid iyo mucaaridba si wada jir ah usoo dhoweynayaan weftiga madaxweynaha.
Sidoo kale, gudoomiye Faysal
wuxuu ku dhawaaqay in la joojiyo wada hadalkii u dhexeeyey Somaliland iyo
Soomaaliya, madaama oo dagaal toos ah ku soo qaaday dawlada Soomaaliya.
“Waanu hambalyeynaynaa wadanka
Ginni sida uu usoo dhoweeyey weftigi madaxweynaha, waxaana rajaynaya in aynu
maalin dhow heli doono xaquuqdeeni.”ayuu yidhi gudoomiye Faysal Cali Waraabe oo
ka hadlayey xidhiidhka u bilaabmay Somaliland iyo dalka Ginni.
Mar uu ka hadlayey wada hadaladii
u dhexeeeyey Somaliland iyo Soomaaliya waxa uu yidhi “Khalad weyn bay ahayd in
aanu nidhaahdno Soomaaliya waanu la hadlaynaa, markuu madaxweynuhu soo noqdo
waanu ka wada hadli doonaa oo qaraar baa laga soo saari doono in la joojiyo,
maadama oo aanay jirin dawlad Soomaaliya ahi oo dalkeeda ka wakiil ah oo nala
siman oo dadku soo doorteen oo cashuur qaadda oo ilaalisa badeeda aanay jirin anagu la
fadhiisan mayno.”
“Soomaaliya laba dal bay ahayeen
midna wuu jira midna ma jiro, marka wada
hadalkaasi dhibaato ayuu inoo keeno marka dalalka caalamka Ictiraafka
waydiisanna waxay nagu odhan jireen sookan wada hadalku idin socda bilow heshiiyaan marka caqabad buu inagu ahaa
wada hadalkaasi, waxaanu leenahay wada hadalkaasi ha la joojiyo”.
Dhinaca kale, waxa magaaladda
Hargeysa wadooyinkeeda la sudhay boodhadh ay ku sawiran yihiin madaxweyne Biixi
iyo madaxweynaha Dalka Ginni Kanakori, waxaana si weyn loogu diyaar garoobayaa
soo dhoweynta weftiga madaxweynaha oo la filayo inuu maalinta Barri yimaado.
Tan iyo intii ay ku dhowaaqday
dawlada Soomaaliya inay xidhiidhkii u jartay Gini maadaama oo weftigii
Somaliland soo dhoweeyeen waxa shacabka indhiisa u jihaysteen dhinaca
Soomaaliya, taas oo midaysay shucuubtii Somaliland muxaafad iyo mucaarad, waxaana baraha
bulshada ku arkaysa dadkii oo calanka Ginni ku dhajistay baraha bulshada ee
lagu wada xidhiidho iyo cambaareen loo jeedinayo dawlada Soomaaliya.
Barkhad-ladiif M. Cumar, Hiiraan Online
[email protected]
Hargeysa, Somaliland.