Jimco, July, 05, 2019 (HOL)-Xiisad ka dhalatay biyogelinta magaalada Laascaanood ayaa todobaadkan taagnayd ka dib markii isbahaysi hantiilayaal degaanka ah ay isu diyaariyeen in ay daboolaan baahida biyood, balse taas wasaarada biyaha ay waxba kama jiraan ku tilmaantay.
Xiisadan ayaa cirka mar keliya isku shareertay ka dib markii qaar
ka mid ah Shirkada Nugaal oo todobaadkii tegey wadey sidii ay qasabadaha
biyaha u soo taxaabi lahaayeen iyagoo dhinaca bari ka keenaya xabsiga
loo taxaabay, laguna eedeeyey in ay hanti qaran u isticmaaleen sidii
hanti ay leeyihiin.
Wasiirka Wasaarada Biyaha
oo mudo ku sugnaa magaalada Laascaanood ayaa meesha ka saaray in
biyogelinta magaalada shirkad gacanta loo geliyo "Aniga Saleebaan ahaan
waxaan hayaa hanti umadeed ee ma hayo hanti cid gaar ahi leedahay, ana
gacanta u gelinmaayo" ayuu yidhi wasiir Saleebaan Yuusuf Cali Koore.
Shirkada
Nugaal waxay Ceelal dhawr ah ka qoday bariga magaalada Laascaanood,
waxay keeneen wershedo sifeeya biyaha iyo khuboro dalka Shiinaha ay ka
soo kaxaysteen si ay qalabka biyaha safaynaya iyo baadhistoodaba ugu
fududeeyaan.
Halka sartu ka qudhuntay ayaa noqotay kadib
markii shirkadani ay u adeegsadeen agab ay lahayd wakaaladii biyaha ee
Soomaaliyao iyo kuwo ay hay'addo ku kordhiyeen sagaashamaadkii oo uu ka
mid yahay Taangiga kaydka biyaha.
Inkasta oo Ganacsatada
jeebka buuran intooda badan ay ku midaysan yihiin shirkadan ayaa hadal
haynta dadka badankoodu ay qabaan in hadii shirkadani ay qabsato biyaha
iyagoo horeyna korantada u haystey ay noqonayaan in ay bulshada siday
doonaan ka yeelaan, halka dadyar ay qabaan in muhiim ay u tahay oo
keliya biyo in la helo.
Maxamed Jabuutaawi oo ka mid ah
Ganacsatada ugu saamaynta badan magaalada oo shalay ka hadlay biyaha
waxa uu sheegay in ay xaaraan tahay in cid gaara biyaha gacanta loo
geliyo.
Magaalada Laascaanood oo biyogelintii
ugu horaysey lagu sameeyey kontomaadkii oo ay 2000 ruux ku noolaayeen
waxaa biyaha laga siin jirey ceel ku yaala magaalada Badhtankeeda,
dawladii kacaankii ayaa markale Goojacade oo duleedka magaalada
biyogelin ka samaysay waxase ay la burburtay dawladii, 1993dii hay'adda
OXFAM ay samaysay biyogelintii ugu balaadhnayd waxayse shaqaysay mudo
kooban.
Somaliland mudo 12 sano ah waxa ay isku day ay
hay'addo kaladuwan gacansiinayaan ay ku sameeyeen biyogelin iyo
baadhitaano badan oo malaayiin Doolar ku bexeen waxaase ay noqdeen
dhamaantood hal bacaad lagu lisay, waxaase haatan loo hayaa dhaqaale aad
u badan oo biyo nolosha ku haboon loogu baadigoobayo magaalada waana
taas ta keentay in dadbadan u xusul duubaan sidii ay u hantiyi lahaayeen
dhaqaalahaa oo horumarinta haatan taala lagu sheegay shan milyan oo
Doolar.
Magaaladan waxa ay leedahay laba ilo biyood oo mid ka
mid ah ay tahay durdurka Laascaanood oo aan dadku cabin waxna ku karsane
ee waxyaabaha kale ay u isticmaalaan halka isha labaadna ay tahay
Barkadaha biyaha roobka lagu kaydiyo.
Seynab Cabdi Warsame
laascaanood G.sool
