Shirkadda Singapore New Silk Energy Somaliland oo shaqaalihii ay qaadanaysay sadex boqol ka qaadanaysa dhallinyarada shaqo qaran
Talaado, July, 30, 2019 (HOL – In ka badan shaqaal boqol oo dhalinyarada shaqo qaran ah ayaa maanta u fadhiistay imtixaan ay u galiyeen shirkadda sifeyn doonta Saliida ee Singapore New Silk Energy Somaliland (SNSES), kaasi oo qaadanay saddex boqol oo shaqaale ka hawlgali doonna shirkaddaasi.
Dhallinyarada shaqo qarin ka soo
baxday ayaa saaka ku gallay imtixaanka jaamacada Hargeysa, waxaana la sheegay
inay imtixaanka soo diyaariyeen,isla markaana ay qaadayaan masuuliyiinta
shirkadan oo ah Chines.
Agaasimaha guud ee shaqo qaran
Maxamed Xuseen Cismaan ayaa u sheegay in shuruudihii imtixaanka lagu galayey
ahaayeen inuu qofku sito aqoonsigiigii Shaqo qaran, islamarkaana uu soo
codsaday Imtixaanka, waxaana uu xusay in Imtixaanka loo gelo doono si cadaaladd
ah.
“Waxaan joognaa xaruntii Jaamacada Hargeysa oo
maanta uu ka socdo Imtixaankii Shirkada Singapore New Silk Energy Somaliland
(SNSES), imtixaankaa oo lagu tartamayo (300) Saddex boqol oo jago oo ay
qaadanayaan shirkadaasi , Imtixaanka waxa u fadhiistay maanta tiro shaqo qaran
kamida oo gaadhaya (980) Sagaal boqol iyo siddeetan xubnood waxaa kasoo bixi
doona Saddex boqol ee ugu derejada sareeya”ayuu yidhi Mr:Mu’adin. .
“Imtixaanku waa laba qeybood mid waa imtixaan
qoraal ah oo hadda ay u fadhiyaan, waxaa ku xiga Imtixaanka ah (Interview)
waraysi fool ka fool dhalinyarada mid mid loola kulmayo, labadaa imtixaan inta
ugu wanaagsanaata ayey shirkadu qaadan doonta si fiican bay u socotaa ilaa
hadda”ayuu raaciyey hadalkiisa.
Dhinaca kale, qaar kamid ah
dhalinyaradii shaqo qaran ayaa sheegay in dhalinyaro kale oo aan ku jirin shaqo
qaran imtixaanka u fadhiisteen oo gaar
looga qaadayo goob hoteel ah, waxaanay ku doodeen in markiii hore agaasimuhu
sheegay in afar boqol oo qof la
qaadanayo, hadase waxa uu sheegay in saddex boqol la qaadanayo taas oo ah in
dhalinyaradaasi kale ee imtixaanka u fadhiistay boqolkii kale la siinayo.
“Agaasimaha shaqo qaran waxa uu markii
hore sheegay in afar boqol la qaadanayo, waxaana aragnay dhalinyaro aan shaqo
qaran ahayn oo kaadhkii shaqo qaran haysta, markii aanu diidnay waxa iyaga la
geeyey hoteelka Garan-xadi oo imtixaankayagii oo kale laga qaadayo,
warbaahintii ka soo duubtay kamaradihii baa laga jajabiyey, marka boqolkan
hadda laga reebay afartii boqol waa boqolka gaarka imtixaanka looga
qaadayo”ayuu yidhi mid ka mid ah dhalinyarada ka cabanaysay in dad kale lagu
soo daray dhalinyarada shaqo qaran.
Dhallinyarada ka cabanaysa kuwo
kale lagu soo daray ee iyaguna imtixaanka laga qaadaya ayaa madaxweynaha ka
codsaday inuu wax ka qabto oo afartii boqol ee loo ballanqaaday aan waxba laga
reebin.
Barkhad-ladiif M. Cumar, Hiiraan Online
[email protected]
Hargeysa, Somaliland.
